Kreu demokrat Lulzim Basha i ka drejtuar një thirrje mbështetësve të tij që të reagojnë kur ndaj tyre horrat e shtetit qëllojnë.
Në një fjalim nga selia e PD-së, Basha theksoi se mos e ktheni mbrapsht faqen kur ju godasin, por goditini mbrapsht.
”Ne do ta vazhdojmë këtë betejë në çdo qytet, në çdo lagje, në çdo rrugë e çdo shtëpi të vendit tonë deri sa çlirojmë Shqipërinë nga krimi dhe qeverisjen nga kriminelët, derisa ta bëjmë Shqipërinë si gjithë Europa. Pengesa e vetme është kjo qeveri kriminale.
Ka 5 javë që nuk gjen vrimë miu të fshihet. Le ta bëjmë bashkimin tonë dhe protestën tonë të përditshme dhe të përnatshme, zjarr t’i digjet toka nën këmbë. Kjo është rruga jonë.
Rruga që do të çlirojë ekonominë shqiptare dhe që do të clirojë ëndrrat e prindërve shqiptarë për vogëlushët e tyre. Ditë për ditë e natë për natë, me protestë, me qëndresë, me përballje.
Mos e ktheni mbrapsht faqen kur ju godasin horrat e shtetit por goditini mbrapsht.
Kjo ka vetëm një fund fitoren e popullit, fitoren e demokracisë, fitoren e Shqipërisë si e gjithë Europa”, shtoi ai.
