Pero Pejiç “skanon” Skënderbeu-Kukësi. Askush më mirë se ai nuk mund t’i bëjë analizën kësaj supersfide, pasi jo vetëm ka luajtur te të dyja skuadra, por edhe ka fituar trofe. Një prej shënuesve më të mirë në historinë e futbollit shqiptar (me afro 140 gola në 10 vite me shkëputje) shpreh habinë e tij se si në Kategorinë Superiore nuk ka më gola si më parë.
Në një intervistë të dhënë ekskluzivisht për “Panorama Sport”, kroati thekson se çështja e titullit nuk është mbyllur ende. Verilindorët i sheh në garë dhe hapur e thotë që gjithçka do të vendoset në dy përballjet direkte që do të luajnë kundër Partizanit kryesues. Nuk kishte si të mos fliste për Skënderbeun, për të cilin ndien keqardhje.
Cilin sheh më të avantazhuar në garën për kreun?
Partizani ka 6 pikë më shumë se Kukësi, por kjo nuk do të thotë që e ka të sigurt fitimin e titullit kampion, pasi ka akoma dhe shumë ndeshje. Gara mes Kukësit dhe Partizanit do jetë shumë e fortë dhe unë mendoj se ekipi që do bëjë më pak gabime nga tani e në vazhdim do ta fitojë kampionatin. Të mos harrojmë se kanë dhe dy ndeshje ballë për ballë. Aty do duket forca e të dyjave.
Si e shikon Skënderbeun këtë vit? Mos ndoshta prej dobësimit të tyre, po “feston” edhe Partizani?
Ata e nisën kampionatin shumë mirë, por pastaj gabuan hap pas hapi për disa muaj rresht, e kjo mua më ka habitur. S’e kam kuptuar pse në shumë muaj kanë pasur të njëjtën ecuri. Tashmë, duket se kanë ndryshuar, por sërish duhen parë. Nuk është për kampionatin shqiptar që Skënderbeu mos të jetë ndër ekipet e para. Sa për Partizanin, kanë të tjerë konkurrentë, edhe pse Skënderbeu nuk është në top-formë. Kukësi dhe Teuta janë rivalë të denjë dhe mendoj se deri në fund do ketë surpriza. Kukësi është ekip që me pak kujdes do të bëjë diferencën.
Nëse Kukësi lë pikë me Skënderbeun, a mendon se do të ketë më shanse për titullin?
Kukësi është më mirë dhe më i fortë se Skënderbeu aktualisht. Korçarët kanë bërë shumë gabime gjatë këtij kampionati dhe kjo është e dukshme edhe nga renditja. Nëse Kukësi fiton këtë javë, atëherë padyshim që do të mbetet në garën për titull, dhe me shumë gjasa skuadra e Cungut do të largohet me tri pikë të plota nga Korça, por gjithsesi duhet parë. Ka akoma edhe shumë ndeshje për tu luajtur, ndaj nuk mund ta konsideroj vendimtare këtë por gjithsesi do të ketë ndikimin e vet për ecurinë e secilit ekip.
Dikur kishte edhe bombera në Shqipëri, por tashmë ekipet pretendojnë titullin duke shënuar 1 gol mesatarisht për ndeshje… Pse ndodh kjo?
Është e vërtetë që janë shënuar pak gola. Dhe unë mendoj se ai që kërkon të fitojë kampionatin nuk duhet të mjaftohet me një mesatare të tillë./Panorama Sport
