Nga Boldnews.al
Në karrierën e tij ka firmosur për herë të parë në bordero si deputet, gjë tjetër nuk kishte bërë në jetë, përveçse si gazetar e drejtues, gjithnjë pranë ZP-së, deri në momentin që më 28 dhjetor, kryeministri Edi Rama i komunikoi se Erion Braçe do të jetë zëvëndëskryeministër. Ai u përlot, e ndoshta në atë moment ka menduar: Kjo është dita ime, do ta shohin kush është Braçja i vogël, që studentët e revoltuar e kishin ironizuar aq hollë, sa edhe vetë nuk kishte gojë të fliste.
Në pak më shumë se dy muaj si nëkryeministër, Braçe ka mbërritur administratë më administratë, duke u kërkuar llogari për shërbimin ndaj qytetarëve, çështje statistikash, mënyrën si vishen, dhe mbi të gjitha a i zbatojnë oraret zyrtare.
Ka mbetur që në të shkuarën tonë të trishtë të komunizmit që e konsideronin të paaftë një brigadier a përgjgjës sektori që reputacionin dhe llogaridhënien e kishte vetëm në çështjen e orarit, pa i futur në produkt dhe thelbin e problematikës.
Po ti nënkryeministër a e di se ka drejtorë që rrinë të përpiktë në zyrë, madje më orë të zgjatura edhe jashtë orarit zyrtar, për të bërë allishverishe me djersën qytetare? Që kërkojnë para për një shërbim që çdo qytetari i takon, që lyjnë e lajnë pushtetarë me dreka e darka të përzgjedhura. Që u qepen pas deputetëve me influencë dhe trashin zullumin me dhjamin e tretur të hallexhinjve.
Për ty këta drejtorë duhen konsideruar si vlerë kombëtare, mundësisht të ngjiten në karrierë, e pse jo të shpresojnë që në zgjedhjet e ardhshme të futen në listat e deputetëve. Pse? Sepse respektojnë oraret dhe të zenë sytë me statistika. Shumë flitet për korrupsion, por si njeri i shifrave, Braçe duhet ta dijë mirë se prokuroria është në duart e shefit të tij të madh. Shpërthejnë skandale tenderash dhe konçensionesh marramendëse dhe kërkush nuk mban përgjegjësi, dosjet mbyllen ende pa u hapur.
Çdo javë ka një “buletin informativ” që jepet nga “spikerja simpatike” Etilda Gjonaj, që në kohën e “lirë” është edhe Ministre e Drejtësisë. Ajo jep e shet shifra për shkarkime, masa ndëshkimore administrative dhe lloj e sorollop informacionesh që më së shumti çudisin kryeministrin. Heqin një drejtor e sjellin një tjetër, edhe ai si i pari, edhe tjetri që vjen më pas si të tjerët. Vidh e dil në ER TV…!
Si ndihet Braçe kur shkon në zonën e tij në Divjakë dhe fermerët i ankohen për mungesën e subvencioneve, por politikat fiskale që ua kanë zënë frymën, për produktet që detyrohen ti hedhin nga mungesa e tregut.
A e di që edhe atë pak bujqësi që afër gjysma e popullsisë mban frymën e kanë zaptuar oligarkët. Ata që dërmojnë më të voglin dhe bëjnë ligje për të përfituar subvencionet shtetërore për vete.
Shih orën Braçe! Shko në orën 8 në institucione se me siguri do gjësh drejtorë që rendin në orarin fiks drejt zyrës për të ndarë një aferë të madhe, ca për vete ca për shefin! Se edhe ai ka një shef, që ti e sheh mirë, por duke qenën nëkryeministër e ke të vështirë të ngresh zë, je poshtë, nxirr vetëm dorën e shih orën, ndaj të vendosi aty ku je!
