Lefter Koka është ligjvënësi i vetëm nga grupi parlamentar i LSI-së që nuk ka dorëzuar mandatin e deputetit, ndërkohë që kolegë të tij në opozitë iu bindën vendimit politik të marrë nga forumet partiake.
Gjithsesi kjo nuk e ka shqetësuar deputetin Koka, që pohon se është pjesë e LSI-së dhe që ka raporte shumë të mira me kryetaren e kësaj partie, Monika Kryemadhi.
Deputetët që nuk i kanë dorëzuar mandatet, apo ata që janë në listë dhe presin për t’I marrë, janë konsideruar si tradhëtarë, por duket se ky term nuk pranohet nga Koka.
“Jam pjesë e LSI-së, nuk kemi patur nga ai moment ku vendimi im ishte i ndryshëm nga ai i grupit parlamentar. Ne me të vërtetë propozohemi nga një forcë politike sepse ashtu është kodi, por secili në momentin që zgjidhet përfaqësohet në parlamentin shqiptar”, tha Koka.
Madje, ai pohon se do të votojë çdo nismë që ka të bëjë me ndryshimet në Kodin Zgjedhor dhe që garanton një përfaqësim sa më të drejtë të qytetarëve në Kuvend.
“Ajo që është për të thënë dhe besoj që kërkon vëmendje të madhe nga anëtarët e parlamentit është riparja e kodit zgjedhor. Sot jemi kthyer qesharake për shkak të këtij kodi. Nëse do të vazhdojnë deputetët t’i binden kryetarëve të partisë për ti emëruar apo shkarkuar, unë mendoj se ky parlament do humbë funksionin e tij. Ndaj çdo nismë që do të bëjë përfaqësimin e qytetarëve shqiptarë në një mënyrë sa më të drejtë, do të ketë mbështetjen time dhe të deputetëve të opozitës”, tha Koka.
Por me një vendim të firmosur nga Monika Kryemadhi, LSI do të përjashtojë si anëtarë dhe nga forumet të gjithë ata që nuk dorëzojnë mandatet apo i marrin ato si deputet liste. Nuk dihet nëse ky vendim do të zbatohet edhe ndaj Kokës apo jo…
