Nga Boldnews.al
Pamjet e trishta të një dite më parë në afërsi të Shkollës “Petro Nini Luarasi” në Tiranë treguan fytyrën e vërtetë kur dhuna e pushtetit të vjen në prag të shtëpisë. Përmbarues agresivë që shkelmonin portën e një banese ku jetojnë katër familje, dhjetëra efektivë policie në që terrorizuan gra shtazëna, fëmijë të vegjël dhe të moshuar invalidë.
Histerizmi shtetëror për tre orë ra mbi ta, por brenda familjeve që tentonin të mbronin banesat, ishte edhe një efektive policie, që këtë radhë nuk qe në kordonin me kolegët, por përballë tyre, duke mbrojtur shtëpizën e saj, në sy të fëmijëve të mitur.
Blerta Dervishi, punonjësja e policisë të cilës dje iu desh të përballet me kolegët e saj për të mbrojtur banesën, u pezullua sot me urdhër të titullarëve me motivacionin që nuk ka lejuar përmbarimin të kryejë detyrën.
“Më morën në telefon dje dhe më thanë që do të pezullohesh dhe do të marr vërejtje se kam penguar përmbarimin të kryejë detyrën. Ndërsa sot m’u komunikua me shkresë se pezullohem 1 deri në 3 ditë dhe pezullimi shoqërohet edhe me vërejtje. Unë nuk kam bërë asnjë shkelje, mbrotja shtëpinë time. Veprimet e mia ishin jashtë orarit të punës, nuk kishte lidhje me detyrën ”- tha efektivja Dervishi.
Duhet ta provonte vetë në shpinën e saj padrejtësinë që të shohë ndryshe rastet e tjera kur vetë ajo të jetë në krye të detyrës, gjithnjë nëse shefat e medhnj nuk do ta flakin në rrugë pas paralajmërimit të parë. Edhe policët e thjesht janë të prekshëm, të dhunuar nga arroganca qeveritare, të përbuzuar nga shefat e tyre që kanë mbi kokë, të keqpaguar dhe në vështirësi pune.
Uniforma nuk do i mbrojë kur tu vijë i forti me lidhje pushteti në pragun e shtëpisë. Nuk do mbrohen kur forca pushtetit tua marrë pronën për tia dhënë tjetërkujt që ka forcën, paranë dhe miqësinë në politikë dhe sistemin e drejtësisë.
Në rastin e djeshëm, kryeministri Edi Rama reagoi duke justifikuar “terrorin policor” me argumentin se policia e ka për detyrë të mbështesë çdo përmbarues që kërkon ekzekutimin e një vendim gjyqësor i formës së prerë, në një konlikt pronësie mes dy palëve private.
Por ky kryeministër harron se nuk ishte parë gjëkund që të rreshtoheshin mbi 50 efektivë të rendit dhe forcave Shqiponja, në shërbim të një individi, që rezultoi se është me të shkuar të rëndë kriminale.
Janë mijëra vendime gjyqësore të formës së prerë që nuk ekzekutohen nga përmbarimi, ata shpesh kërkojnë ndihmën e policisë, por kurrë nuk u ofrohet kjo mbështetje. Po në rastin e djeshëm përse u bë ky përjashtim? Sepse individi që kishte fituar pronësinë (nga kjo drejtësi që dihet si është), ka mbështetje në politikë dhe jashtë saj, në polici apo bashki. Sepse qenka edhe ndërtues, përveçse i akuzuar për një vrasje të katërfishtë, por një ditë të vetmë burgim nuk bëri.
