Nga Boldnews.al
Prokurori i Tiranës, Genc Qana, rezulton të jetë i apasionuar pas numri të lartë të automjeteve. Në bazë të deklaratave të pasurisë, ai rezulton që të ketë aktualisht në pronësi 5 automjete, për të cilat pyetja më e thjeshtë është: “ku i parkon të gjitha”?
“Boldnews.al” ka konsultuar deklaratat e pasurisë të prokurorit Qana, të cilat janë të publikuara në portalin informativ “spendingdata.al”.
Në deklaratën fillestare, të dorëzuar pranë Inspektoratit të Deklarimit të Pasurive në vitin 2003, Genc Qana, i cili në atë kohë ishte prokuror tek Krimet e Rënda, shënon se kishte në pronësi një automjet tip Volksvagen. Sipas deklarimit të pasurisë, këtë automjet e ka blerë në shumën 200 mijë lekë.
Një vit më pas, në 2004, prokurori Genc Qana dhe bashkëshortja e tij blejnë dy automjete të tjera. Konkretisht, në Qershor 2004, familja Qana blen një Volksvagen Golf 3, me vlerë 500 mijë lekë.
Rreth 6 muaj më pas, në mes të Dhjetorit 2004, familja Qana blen një automjet tip Fiat Panda, me vlerë 70 mijë lekë të reja.
Pas dy vitesh, në Dhjetor 2006, prokurori Genc Qana e heq nga “koleksioni” i tij automjetin Fiat Panda, duke e shitur me të njëjtën vlerë që e kishte blerë, 70 mijë lekë të reja.
Vetëm pak ditë pasi “lirohet” nga pronësia e këtij automjeti të thjeshtë, prokurori Qana blen një mjet Peugeot, me vlerë 320.000 lekë.
Pra, deri në vitin 2006, sipas deklaratave të pasurisë, prokurori Qana, i cili në atë kohë ushtronte funksionet tek Krimet e Rënda, kishte “koleksionuar” 3 automjete; dy Volksvagen dhe një Peugeot.
Për disa vite, prokurori Qana nuk angazhohet në shit-blerje automjetesh. Në vitin 2008, ai transferohet si zëvendëdrejtues në Prokurorinë e Tiranës.
Rreth 4 vjet më pas, në vitin 2012, Genc Qana rikthen sërish vëmendjen nga “garazhi” i tij. Në dhjetor të atij viti, prokurori shpenzon 14.900 euro për të blerë një automjet Ford Focus C-Max. Sipas deklaratës së pasurisë, ai ka përdorur para nga kursimet e tij, një dhuratë 4 mijë dollarë nga vjehrri i tij, si edhe një hua pa interes në vlerën 5 mijë euro.
Pra, sipas kësaj llogarie, pjesa më e madhe e këtij automjeti është blerë me para të personave të tjerë. Mesa duket, prokurori Qana ka qenë i vendosur për ta shtuar këtë automjet në “koleksionin” e tij.
Por nuk përfundon këtu. Gjithnjë sipas vetëdeklarimit të pasurisë, ai, në vitin 2013, blen edhe një automjet Fiat, me vlerë 150 mijë lekë.
Në total, deri në vitin 2016, prokurori Genc Qana numëron 5 automjete në pronësi të tij e të bashkëshortes.
Në bazë të deklaratave të pasurisë ndër vite, për periudhën 2003-2016, prokurori Genc Qana deklaron se ka blerë 6 automjete, nga të cilin vetëm për njërin deklaron se e ka shitur. Praktikisht, sipas formularëve të pasurisë, ai ka në pronësi 5 automjete, për të cilat vlen sërish pyetja fillestare: “ku i parkon të gjitha”? Aq më tepër që tashmë është vështirësuar shumë parkimin në Tiranë…
