Një tragjedi ajo e ndodhur pasditen e kësaj të shtunë në familjen Lleshi në një fshat të Peqinit, ku njëri prej vëllezërve ka qëlluar me armë zjarri tjetrin, duke i shkaktuar vdekjen. Dyshimet e policisë janë se vrasja është aksidentale.
Sipas një rindërtimi paraprakë të ngjarjes nga policia e Elbasanit, bazuar në dëshminë e vëllait më të vogël, atij që shkrepi këmbëzën, dy vëllezërit kishin dalë për të kullotur bagëtitë në pyllin e fshatit Galush. Në një moment, K.Lleshi ka shprehur aksidentalisht këmben e çiftes duke qëlluar të vëllain Ronaldo, 20 vjeç.
E shtëna rezultoi fatale për jetën e 20-vjeçarit, i cili nuk arriti të mbijetojë.
“Në pyllin e fshatit Galush, Peqin, dyshohet se një i mitur i cili ende nuk ka mbushur moshën 14-vjeç, dyshohet se nga pakujdesia iu shkrep arma e gjahut dhe ka vrarë vëllain e tij shtetasin R.Ll., 20 vjeç. Ata ishin duke kullotur bagëtitë kur ndodhi ngjarja. Grupi hetimor po punon për zbardhjen e plotë të rrethanave të ngjarjes”, njoftoi zyrtarisht Policia e Elbasanit. /Boldnws.al/
