Policia e Elbasanit ka arrestuar Bledar Muça, Florenc Çapja, Ardjan Çapja pasi ditën e djeshme kanë qëlluar mbi Policinë e shtetit.
Nga burime të policisë mësohet se këtyre personave ju gjetur armë dhe kapsolla detonatore. Armët u gjendën në afërsi të vendit të ngjarjes dhe dyshohen se janë të autorëve. Ndërkohë, pritet dhe arrestimi i gjashtë personave të tjerë.
Të shtënat e armëve ditën e djeshme
Qytetarët e Elbasanit u tronditën nga të shtënat që zgjatën rreth 2 minuta, në afërsi të vendit të quajtur “IshKonservimi”. Paniku ka qenë shumë i madh, për shkak se vendi ku u qëllua ndodhet pranë parkut “Rinia”.
Brenda pak minutash, rrugët u boshatisën nga kalimtarët, ndërsa forca të shumta policie rrethuan zonën. Dëshmitarët thonë se u bllokua një makinë tip “Hunday”, me targë AA411 AU, por nuk dihet nëse u përket punonjësve të policisë apo familjes Çapja.
Vetë Policia e Elbasanit, në një deklaratë paraprake për shtyp, bëri të ditur se, rreth orës 19:40, anëtarë të familjes Çapja kanë qëlluar mbi Policinë e Shtetit. “Policia e Shtetit i është kundërpërgjigjur sulmit me armë, ndërsa shoqëroi dy prej anëtarëve të kësaj familjeje në Polici dhe është në kërkim të një personi të tretë”. Në vijim të komunikatës së Policisë thuhet se nga sulmi nuk ka të dëmtuar nga forcat e Policisë, por edhe nga ana e familjes Çapja. Emra konkretë nuk u dhanë nga Policia, ndërsa kanë qenë vetë familjarët që reaguan më pas, duke thënë se uniformat blu e RENEA po terrorizojnë njerëzit e tyre. Ngjarja e mbrëmshme pasoi atentatin ndaj Bledar Muçës dhe fillimisht u dyshua se kishte pasur një tjetër shënjestër. Por më pas u konfirmua se të shtënat ishin mes Policisë dhe disa personave, të afërm të familjes së biznesmenit të vrarë në vitin 2015, Sokol Çapja.
Përplasja
Ndërsa nuk ka të dhëna të sakta se pse ka ndodhur përplasja me armë, dyshimet bien mbi një “provokim” nga ana e Policisë.
Nga burime jozyrtare bëhet e ditur se shkak për këtë ngjarje ka shërbyer patrullimi që një makinë me targa private, ku ndodheshin disa efektivë policie, civilë, po bënte përreth zonës ku jeton familja Çapja dhe të afërm të saj. Duket se nga fakti i hasmërive të lindura dhe atentati i ndodhur ndaj Bledar Muçës vetëm 48 orë para, anëtarë të kësaj familjeje kanë pasur dyshime mbi personat që po lëviznin në terrenin e tyre. Nga frika se nga makina e panjohur mund të sulmoheshin me armë, ata janë vënë në ndjekje të saj. Në afërsi të parkut “Rinia” është hapur zjarr mbi mjetin e efektivëve, të cilët gjithashtu u janë kundërpërgjigjur me armë të llojit pistoletë. Pas të shtënave, civilët kanë kërkuar përforcime, por autorët e familjes Çapja janë larguar më pas nga vendi i ngjarjes.
