Peter Olainka është nga ata futbollistë që ka lënë gjurmë në kampionatin tonë. U shfaq në fillim te Bylisi, por te Skënderbeu zhvilloi sezone fantastike. Më pas u transferua në Belgjikë për një shifër rekord. Nigeriani tashmë është pjesë e Slavias së Pragës. Në një intervistë për mediat në vendlindje ai ka treguar për rrugëtimin e tij.
“Isha një futbollist i rrugës, nuk e mora shumë seriozisht derisa njoha një trajner të quajtur Xhon Takpe i cili më mësoi si duhet të punoja. Që atëherë jam përkushtuar, edhe pse ishte e vështirë sepse nuk kisha para për të blerë këpucë apo rroba, as për të ngrënë apo shkuar në stërvitje. Unë vazhdova, derisa arrita të siguroja një vizë për në Shqipëri”, shprehet fillimisht Olainka.
“Nuk e dija që atje do të ishte e vështirë, ndaj firmosa për Bylisin, kur isha vetëm 16 vjeç. E nisa me të rinjtë dhe 6 muaj më vonë kalova te ekipi i parë. Luajta disa ndeshje dhe fitova famë atje. Shkova në huazim në Qipro dhe u ktheve në Shqipëri për t’iu bashkuar skuadrës më të mirë në vend, Skënderbeut. Në atë kohë fituam titullin dhe mundësinë për të luajtur në Europa Ligë, për herë të parë në historinë e futbollit shqiptar. Jam krenar për këtë”, kujton sulmuesi.
Tashmë pjesë e Slavias së Pragës, ku po bën mjaft mirë, Olainka tregon se ka synim të tregojë vlerat edhe në Çeki. “Objektivat e mi për 5 vitet e ardhshme është të jem në maksimum. Dua ta gjej veten në një ekip të madh. Në 2022-shin uroj të jem në Botëror si pjesë e Nigerisë, do të ishte krenari”, përfundon 23-vjeçari.
/BN/
