Pas ndarjes nga jeta të Armand Hysit, si pasojë e një ataku kardiak në zyrë, është emëruar sot drejtuesi i ri i Zyrës së Regjistrimit të Pasurive të Paluajtshme në Sarandë. Romina Pulaj, e cila prej 5 vitesh mban funksionin e juristes për zonën e Sarandës në këtë zyrë, do të jetë njeriu që do të vazhdojë punën e lënë në mes nga Armand Hysi.
Armand Hysi, edhe pse e drejtoi këtë institucion për vetëm 4 muaj, përveç dhënies së hipotekës për 3.500 prona që aplikuan gjatë kohës që ai drejtonte ZRPP Sarandë, arriti të përmbyllte punën dhe të dorëzonte hipotekën për rreth 2.500 dosje pronash të mbetura stok prej kohësh në zyrat e Hipotekës së Sarandës.
29-vjeçarja Romina Pulaj, pas emërimit në këtë detyrë mësohet të jetë shprehur se është një barrë e rëndë që i është ngarkuar, por se do të bëjë gjithçka për të vazhduar në standardet e vendosura nga paraardhësi i saj në shërbimin ndaj qytetarëve.
Ajo që bie në sy është padyshim mosha e re e drejtoreshës së sapo emëruar. Duket sikur është kthyer në ‘trend’ për qeverinë Rama, të emërojë në krye të ministrive dhe drejtorive kyçe njerëz të rinjë e pa eksperiencën e nevojshme. A do të mundet vallë një vajzë vetëm 29 vjeç, të çojë përpara detyra dhe përgjegjësi që peshojnë më shumë se postimet në rrjetet sociale dhe jetën virtuale?