Mosrespektimi i minoritetit grek dhe pretendimet për çamët përbëjnë dy pengesa të pakapërcyeshme për Shqipërinë drejt BE-së, u shpreh nga kryeqyteti i Malit të Zi, Podgorica, presidenti grek, Prokopios Pavlopoulos.
Kjo nuk është hera e parë që Presidenti grek mban një qëndrim të ashpër ndaj Shqipërisë, veçanërisht ndaj shqiptarëve të Çamërisë.
“Greqia nuk e kundërshton perspektivën europiane të Shqipërisë, por sjellje si ato ndaj minoriteti grek përbëjnë një pengesë të pakapërcyeshme për rrugën e Shqipërisë drejt Bashkimit Europian. Një tjetër pengesë lidhet me çdo pretendim të të drejtave të të ashtuquajturëve çamë shqiptarë, të cilët kanë qenë bashkëpunëtorë të pamëshirshëm të nazistëve, siç e ka vërtetuar historia”, ka thënë ai.
Ai deklaroi gjithashtu se nëse Turqia, Maqedonia e Veriut dhe Shqipëria duan një perspektivë europiane, duhet të respektojnë kuadrot ligjore europiane dhe ligjet ndërkombëtare.
