Vendimi për bojkotin e kampionatit të futbollit në Shqipëri i marrë sot nga Shoqata e Arbitrave i ka gjetur të gjithë të papërgatitur… edhe vetë arbitrat. Në fakt, situata është skandaloze, pasi Shoqata në fjalë, e cila duhet të mbrojë interesat e tyre, as që ka marrë mundimin që të kontaktojë me gjyqtarë të elitës për të kërkuar qoftë edhe një mendim.
Vip Sport ka kontaktuar gjyqtarë të elitës në momentin e përhapjes së lajmit të bojkotit të kampionatit nga xhaketat e zeza dhe ndalimit të të gjitha aktiviteteve futbollistike në vend deri në kthimin e policisë, sipas njoftimit të Shoqatës që u shpërnda nga zyra për shtyp e FSHF-së. Por gjyqtarët kanë ngritur supet në një situatë të tillë, duke konfirmuar se nuk kishin dijeni për ekzistencën e një vendimi të tillë të prerë.
Ata nuk kanë mundur të bëjnë një reagim të tyrin për këtë verim skandaloz të Shoqatës, vetëm për faktin se nuk u lejohet dhe se do të penalizoheshin në karrierën e tyre, siç ka ndodhur shpesh me ata që dalin nga “shinat” e vendosura nga drejtuesit.
Sikur të mos mjaftonte kjo, vendimi i Shoqatës duket krejtësisht i kundërt me mendimin që mbante gjyqtari i dhunuar Eldorjan Hamiti. Ky i fundit, në intervistën e dhënë të hënën për “Top Channel”, tha se ishte i gatshëm të zbriste në fushë që në këtë javë, pavarësisht shenjës që i kishte lënë ngjarja e dhunshme në Kamëz.
Ndaj natyrshëm lind pyetja: Nëse jo gjyqtarët, kujt i intereson dhe kush e mori vendimin për të ndalur kampionatin?
