Nga Boldnews.al
Petrit Fusha, ish-prokurori i Tiranës që paraqiti dorëheqjen nga funksioni, do të mbahet mend më së shumti për “takimin” me Lali Erin, në vijim të të cilit u mbyllën hetimet për vdekjen e 17-vjeçarit Ardit Gjoklaj në landfillin e Sharrës.
Në gusht të vitit 2016, i riu Gjoklaj u gjet i vdekur, i goditur nga një makineri e rëndë brenda landfillit. Përgjegjësia kryesore për këtë ngjarje të rëndë, krahas manovruesit të mjetit të rëndë, ishte edhe e kryebashkiakut të Tiranës, Erion Veliaj. “Lali” kishte premtuar kushte perëndimore pune në landfill, por pasojat mbi jetën e 17-vjeçarit dëshmuan për mashtrimin e tij.
Erion Veliaj, si personi përgjegjës për mbarëvajtjen e punëve në landfill, nuk u mor asnjëherë në përgjegjësi penale. Madje, atëherë kur opinioni publik dhe opozita kërkonin penalizimin e Veliajt, ai u shfaq hapur, në krah të kryeprokurorit të Tiranës në atë kohë, Petrit Fusha.
“Lali Eri” ia hodhi me atë hetim, ndërkohë që prokurori Fusha duket se ka marrë frytet e atij “deal-i” me kryebashkiakun e Tiranës.
Familjarë të tij të afërt, drejtues të kompanisë së ndërtimit “Fusha” shpk, fituan tenderin për ndërtimin e Sheshit “Skënderbej”. Pa mbaruar mirë këtë projekt, “Fusha” aplikon për ndërtimin e një kompleksi pallatesh, në territorin ku gjendet Teatri Kombëtar.
Qeveria “Rama”, e nxitur nga miku i prokurorit, Erion Veliaj, miratuan një ligj skandaloz, i cili njihet si “ligji Fusha”, me anën e të cilit i hapet rruga prishjes së godinës historike të Teatrit Kombëtar.
Prej muajsh, artistë e anëtarë të shoqërisë civile protestojnë kundër ligjit abuziv “Rama-Veliaj-Fusha”. Por, përtej këtyre reagimeve, “rilindasit” dhe familjari i prokurorit Fusha janë të vendosur për të përfunduar projektin e tyre korruptiv.
Opozita akuzon kryeministrin Rama e kryebashkiakun Veliaj se, nëpërmjet projektit “Fusha” synohet të pastrohen mbi 200 milionë euro të parave të krimit të organizuar.
Petrit Fusha qëndroi për rreth 4 vjet si drejtues i Prokurorisë së Tiranës. Ai njihej si një prej njerëzve më të afërt të ish-Prokurorit të Përgjithshëm, Adriatik Llalla.
Me ardhjen e Arta Markut si Kryeprokurore e Përkohshme, Fusha largohet nga drejtimi i Prokurorisë së Tiranës dhe vijon funksionet në Prokurorinë e Përgjithshme. Ai qëndroi në këtë detyrë deri para pak ditësh, kur vendosi të japë dorëheqjen.
