Çfarë pritet të ndodhi?!/ Basha takim me diplomaten amerikane

E ngarkuara me Punë e SHBA-së në Tiranë, Leyla Moses Ones po zhvillon një takim me kreun demokrat, Lulzim Basha, në selinë e Partisë Demokratike.
Takimi vjen një ditë pas protestës që opozita zhvilloi dje para Kuvendit, e cilësuar si një protestë paqesore dhe pa akte dhune.
Opozita pas dorëzimit të mandateve të deputetëve është vendosur në krye të protestave popullore duke kërkuar largimin e Kryeministrit Edi Rama, krijimin e një qeverie tranzitore dhe zgjedhje të parakohshme.
Më 16 mars, opozita ka paralajmëruar një tjetër protestë të madhe para godinës së Kryeministrisë.
Takimi i diplomates amerikane me kreun e opozitës mund të jetë fillimi i një proçesi të ndërmarrë nga ambasadorët e akredituar në Tiranë për gjetjen e një zgjidhjeje për krizën politike në vend.
Ambasada amerikane në Tiranë ka mbështetur protestat paqësore të opozitës, ka bërë thirrje kundër akteve të dhunës dhe nuk ka mbështetur dorëzimin e mandateve.
Pak ditë më parë, diplomati amerikan Philip Reeker, i cili prej 18 marsit merr zyrtarisht detyrën e zv. Ndihmës Sekretarit amerikan të Shtetit për Europën, deklaroi se “duhet bërë shumë punë urgjente brenda proceseve demokratike. U kërkojmë të gjithë drejtuesve politikë që të shfaqin vullnet politik për t’u angazhuar në institucionet demokratike të Shqipërisë për t’i çuar reformat përpara. Dhe nëse palët ushtrojnë të drejtën demokratike për të protestuar, kjo duhet bërë në mënyrë paqësore”.