Policia e Vlorës ka arrestuar burrin që dhunoi gruan në mes të rrugës në Vlorë. Pas publikimit të videos së dhunës, ku personi në fjalë e kapi për flokësh e më pas e qëlloi me shkelma gruan e re, policia ka identifikuar autorin si dhe ka bërë shoqërimin dhe arrestimin e tij në mënyrë të menjëhershme.
Sipas burimeve zyrtare është arrestuar në flagrancë për dhunë fizike ndaj ish-bashkëshortes së tij, shtetasi Ilirjan Pajo, 44 vjeç, banues në lagjen “11 Janari” Vlorë.
Shërbimet e Policisë së Vlorës kanë bërë arrestimin e menjëhershëm të tij pasi ky shtetas, rreth orës 10:00, në tregun e madh në lagjen “28 Nëntori” pranë “Alfa Bank”, për motive të dobëta, ka ushtruar dhunë fizike kundrejt ish-bashkëshortes së tij, shtetases me iniciale M.C., 38 vjeç, banuese në lagjen “24 Maji” Vlorë.
Arrestimi i këtij shtetasi u bë në dalje të qytetit të Vlorës në vendin e quajtur “Pus-mezini”, duke tentuar t’u largohej shërbimeve të policisë.
