Vangjel Kapllani 17 vjeç, vrau gjyshin e tij me armë në Vlorë, dhe lajmi tronditi mbarë opinionin publik. I mituri mësohet se ka shkuar tek ky akt, jo vetëm për të grabitur një shumë parash, rreth 1 milionë lek, por edhe pas një serie të gjatë debatesh dhe sherresh. Por, ai zgjodhi të ekzekutonte gjyshin që e kishte rritur. Kapllani u ndihmua nga 3 shokë të tij, të cilët i siguruan armën. Vangjel Kapllani është jetim. Kur ishte vetëm 7 muajsh prindërit e tij bënë aksident me makinë dhe humbën jetën. Në këtë ngjarje të rëndë, ai humbi dhe motrën. Kjo bëri që gjyshi i tij, Vangjel Kapllani, ta marrë nipin dhe ta rrisë vet duke u kujdesur çdo ditë për të, deri të mërkurën në darkë. I moshuari i vendosi edhe emrin e tij nipit, për të krijuar një lidhje akoma më të afërt. Përgjatë gjithë këtyre viteve, ishte viktima që e rriti nipin, i siguronte të ardhurat dhe i plotësonte çdo kërkesë. Madje fqinjët e tyre në Vlorë, flasin për një dashuri të madhe që gjyshi kishte për nipin, duke qene se ishte jetim dhe mundohej t’i rrinte gati për çdo gjë.
Konfliktet
Duket se konfliktet e shpeshta të kohëve të fundit me gjyshin, për shoqërinë e gabuar dhe daljet në orët e vona, ishin bërë një problem për të miturin. Në dëshminë që ka dhënë në polici, 16-vjeçari u shpreh se me gjyshin kishte disa muaj që po zihej. Dhe pikërisht këtu lind ideja për ta vrarë dhe ngjarja të inskenohej si grabitje. Në lojë hyjnë 3 shokë të Vangjel Kapllanit që i gjejnë atij një pistoletë. Mbrëmjen e 27 shkurtit, 16-vjeçari merr armën dhe shkon te banesa ku ishte rritur. Para oficerëve të Policisë, Kapllani u shpreh se gjyshi e pa me pistoletë dhe i tha çfarë po bën. “Unë të rrita dhe të dua, pse ma bën këtë. Po gabon”. Sipas dëshmisë në polici, 16-vjeçari ka thënë: “Fillimisht hezitova, por pas disa sekondash u afrova dhe e qëllova pas koke me pistoletë. Armën e hodha në një puset pranë shtëpisë. Pasi e qëllova, lajmërova ambulancën dhe Policinë sikur kishte ndodhur grabitje”. I mituri u arrestua nga uniformat blu dhe tani akuzohet për “Vrasje për shkak të marrëdhënieve familjare”. Në pranga kanë rënë edhe 3 shokët e tij L.M, 17 vjeç, F.Xh, 16 vjeç dhe M.A, 28 vjeç, të cilët akuzohen për armëmbajtje pa leje.
Dëshmia
Vangjel Kapllani ka konfirmuar që e vrau gjyshin vetëm për shkak të konflikteve që kishte me të. “Nuk e duroja dot më. Prej kohësh më stresonte dhe ma kishte nxirë jetën. Vetëm më shante dhe më kërkonte llogari, prandaj e vrava”, u shpreh 16-vjeçari në Policinë e Vlorës. Ndërkohë para se të arrestohej nga Policia, i mituri ka dhënë një intervistë për gazetarët. I qetë dhe i ftohtë 16-vjeçari këmbëngulte se gjyshi ishte grabitur, duke fshehur krimin që kishte bërë.
/Mapo/
