Nga Boldnews.al
Në Prokurorinë e Krimeve të Rënda dosja voluminoze 339, e hapur në vitin 2016, shihet me sy, por nuk po preket me dorë. Me apo pa urdhër politik, kreu i kësaj prokurorie po bën çmos që çështja të mbahet pezull, nën deklaratën se gjoja po hetohet, por pa arritur në asnjë përfundim. Brenda fshihet e vërteta e madhe e dyshimit për shitblerjen e votave në të paktën katër qarqe të vendit, në Tiranë, Durrës, Lezhë dhe Dibër.
Aq masiv ishte fenomeni i blerjes së votave dhe implikimit të botës së nëndheshme të krimit me atë të dukshmen në politikë, sa nga përgjimi i nisura për vëllezërit Avdylaj në Shijak, u zbulua skema e tmerrshme e makinerisë pushtet në shitblerjen e votave.
Deri tani janë zbardhur vetëm një pjesë e vogël e përgjimeve telefonike ku qartësisht kryebashkiaku socialist Vangjush Dako komunikon për çështje votash me persona të dënuar dhe akuzuar për vrasje dhe trafik droge. Megjithëtë janë edhe 400 CD të tjera të cilat janë ende pa u zbardhur dhe nga burimet nga grupi hetimor mësohet se janë implikuar një numër i madh zyrtarësh të nivelit qendror dhe lokal nga pjesa e mazhorancës.
Zbardhja në kohë dhe në mënyrë të paanshme e të gjithë bisedave dhe sigurimi i provave të tjera, mund të shembin njëherë e përgjithnjë “kalanë e letrës” që ka ngritur kryeministri se zgjedhjet e vitit 2017 as janë shitur dhe as blerë prej tij.
Fakti që prokuroria detyrohet të shtojë edhe katër Oficerë të Policisë Gjyqësore në zbardhjen e bisedave nga dy që kishte deri më tani mund të jetë një kërkesë ndërkombëtare. E ndodhur ngushtë para këtij presioni, kryeprokurorja Arta Marku dhe drejtuesja e Krimeve të Rënda Donika Prela, të paktën sa për imazh po tentojnë të japin idenë se janë të angazhuara në zbardhjen e kësaj çështje.
Pak javë më parë Partia Demokratike akuzoi Prelën se ishte në përgjime me grupin “Avdylaj” në Shijak, por ky pretendim u rrëzua nga prokurorët e çështjes. Në një rast të paprecedent dy prokurorët dolën në qëndrim zyrtar.
“Në lidhje me njoftimin publik të bërë të ditur nga konferencën për shtyp datë 28.01.2019 nga Z Enkelejd Alibeaj në selinë e Partisë Demokratik, se Drejtuesja e Prokurorisë së Krimeve të Rënda znj. Donika Prela rezulton e përfshirë në përgjimet e dosjes Nr. 339 në komunikim me anëtarë të grupit të Avdylajt, ju bëjmë me dije se faktet e deklaruara janë të pavërteta”, shkruhej në deklaratën e prokurëve Vlardimin Mara dhe Dritan Prençi.
Pikëpyetjet që u ngritën e ende mbeten janë se së pari prokurorët nuk duhet të shprehen zyrtarisht për një çështje që është nën hetim dhe e dyta që është më e rëndësishme, përderisa ende nuk janë zbardhur edhe 400 disqe me biseda, ku e kanë sigurinë që të mos jetë përfshirë edhe shefja e tyre?
Për momentin këto çedime të prokurorisë janë lënë disa pas, sepse kauza e vërtetë është dyshimi i fortë që zgjedhjet në vitin 2017 janë blerë nga bashkëpunimi i grupeve kriminale me personazhe të lartë të politikës në pushtet. Gjithashtu tregues i rëndësishëm është se Marku dhe Prela detyrohen të vihen në lëvizje për një çështje që ishin kujdesuar ta mbanin të varrosur.
Një pjesë e skemës së shitblerjes së votës dhe lidhjes së krimit të organizuar me politikën në pushtet dyshohet se gjendet në këtë dosje me numrin 339. Nëse e vërteta del shpejt, atëherë Edi Rama që tani po vajton djegien e mandateve të deputetëve të opozitës mund të digjet përfundimisht vetë.
