Katy Perry e vizitoi provincën rurale Ninh Thuan në Vietnam, si pjesë e angazhimeve të saj si ambasadore e vullnetit të mirë për UNICEF-in.
Këngëtarja i vizitoi disa institucione të përkrahura nga UNICEF-i në këtë zonë, si dhe bëri thirrje për të ndihmuar fëmijët e prekur nga varfëria e madhe.
Sipas një deklarate për media të lëshuar nga UNICEF-i, në disa regjione të Ninh Thuanit, rreth 20 për qind e fëmijëve nuk shkojnë në shkollë dhe gjysma e popullatës jeton në varfëri të skajshme.
Organizata po ashtu bëri të ditur se një numër i madh i fëmijëve vdesin nga sëmundje, të cilat lehtësisht mund të parandalohen, por atyre u mungon kujdesi shëndetësor.
Katy Perry është emëruar ambasadore e vullnetit të mirë për UNICEF-in në dhjetor të 2013-ës, me fokus të veçantë në përmirësimin e jetëve të fëmijëve dhe të rinjve në nevojë.
Ndërkaq, kah fundi i muajit maj, edhe presidenti i Shteteve të Bashkuara të Amerikës, Barack Obama, e vizitoi Vietnamin, ku u fokusua në normalizimin e marrëdhënieve ndërmjet dy shteteve, por po ashtu i promovoi të drejtat e njeriut.
