Nga Boldnews.al
Prokuroria e Durrësit është dakord për ndërtimin e një hoteli në zonën e rërës, pranë Urës së Dajlanit, për të cilin vetëm 10 muaj më parë vendosi sekuestrimin e tij, për shkak se po ngrihej shuë pranë vijës së detit.
Në fund të Dhjetorit 2018, gjykata e Durrësit pranoi kërkesën e ndërtuesit të hotelit për heqjen e sekuestros, pasi edhe Prokuroria u shpreh pro, duke shënuar një prej rasteve më skandaloze të hohëve të fundit në sistemin e drejtësisë.
Në Mars 2018, prokurorja Ornela Rrumbullaku kërkoi sekuestrimin e hotelit në ndërtim, pasi, fillimisht nga mediat dhe më pas, bazuar në veprimet paraprake, rezultoi se leja e ndërtimit ishte dhënë në shkelje të ligjit.
Madje, për këtë rast, prokuroria e Durrësit kërkoi edhe arrestimin e Drejtorit të Urbanistikës në Bashkinë e Durrësit, Adhurim Qehajaj, por që gjykata vendosi vetëm “pezullimin e tij nga detyra”.
Në një njoftim zyrtar të Prokurorisë së Durrësit në atë kohë, renditeshin një seri shkeljesh në dhënien e lejes së ndërtimit.
– Zona ku është dhënë leja e ndërtimit është përcaktuar si zonë e Rëndësisë Kombëtare dhe miratimi i lejeve bëhet vetëm nga Këshilli i Rregullimit të Territorit (KRRT), ndërkohë që në rastin konkret leja është dhënë nga Bashkia Durrës;
– Deri në miratimin e Planit të Përgjithshëm Vendor, autoritetet vendore (bashkitë) do të miratojnë leje, me përjashtim të atyre që janë në zonë me rëndësi kombëtare, të trashëgimisë kulturore dhe në brezin bregdetar;
– ndërtimi (objekti hetimi) është brenda kufirit kufizues të përcaktuar si zonë me rëndësi kombëtare, në pjesën e Brezit Bregdetar
Hoteli, në momentin e sekuestrimit (bllokimit). Dallohet afërsia me detin
Nga hetimet e kryera nga vetë prokuroria në atë kohë, rezultonte se objekti ishte vetëm 47 metra nga vija e detit. Afërsia e objektit me detin dallohej qartësisht edhe në materialet filmike dhe fotografike të publikuara nga media.
Në momentin e sekuestrimit dhe bllokimit të punimeve, hoteli ishte në fazën e ndërtimit të katit të dytë.
Por, rreth 10 muaj më pas, Prokuroria konstaton se pozicioni i ndërtimit, megjithëse shumë pranë detit, nuk është në shkelje ligjore. Këtë qëndrim, prokuroria e mbajti në procesin gjyqësor, ku pronari i objektit kërkonte zhbllokimin e pronës së tij.
Në 3 Dhjetor 2018, ndërtuesi i drejtohet gjykatës me kërkesë për lejimin e vijimit të punimeve. Në argumentat e tij, ai zbulon faktin se prokuroria e Durrësit nuk e ka pasur asnjëherë nën hetim ndërtuesin dhe bllokimi i objektit të tij është i pabazuar.
Prokuroria, nga ana e saj, pranoi që nuk e ka pasur në hetim pronarin e objektit për këtë rast. Sipas përfaqësuesit të prokurorisë, në hetim ka qenë zyrtari i Bashkisë. Por, gjithnjë sipas prokurorisë, hetimet për ish-Drejtorin e Urbanistikës, Adhurim Qehajaj, do të pushohen, pasi nuk provohet se ai ka konsumuar elementët e veprës penale “shpërdorim detyre”.
Duke iu përmbajtur këtij argumentimi, Prokuroria e Durrësit relatoi para gjykatës se, në bazë të veprimeve hetimore, rezulton që ndërtimi nuk shkel rregullat e urbanistikës. Ndërtimi i është përmbajtur lejes së ndërtimit dhe, për këtë arsye, duhet hequr sekuestroja.
Pas qëndrimit të prokurorisë, gjykata ka qenë e detyruar nga ligji për të pranuar kërkesën për heqjen e sekuestros së hotelit, vendim të cilin e ka marrë në datë 27 Dhjetor 2018.
Vendimi i gjykatës për heqjen e sekuestros
Tashmë, ndërtimi i hotelit ka mbërritur në katin e pestë. Pas verifikimeve të Prokurorisë së Durrësit, rezultoi që nuk përbën aspak problem që godina është ngritur në rërë, shumë pranë vijës së detit.
Hoteli pas heqjes së sekuestros
Në vendimin e zbardhur të Gjykatës së Durrësit për heqjen e sekuestros, konstatohet se veprimet e prokurorisë së Durrësit ka qenë të mangëta në momentin fillestar. A është një hetim i dobët apo ka fshehur interesa të tjera në këtë “sipërmarrje” të prokurorisë, kjo nuk është e qartë. Fakti është që hoteli në rërën pranë Urës së Dajlanit po vijon të ndërtohet.
