I riu shqiptar i cili humbi jetën në një aksident rrugor të ndodhur në fundjavë në Itali është Klisman Gjini.
Incidenti ndodhi në zonën e Merlengo di Ponzano në Trevizo rreth orës 5 të mëngjesit të së dielës. Tre djem të rinj që udhëtonin me një automjet tip Mercedes u përplasën me një shtyllë betoni.
Për pasojë, makina u përmbys dhe u shkatërrua. Nga aksidenti humbi jetën 19-vjeçari shqiptar Klisman Gjini, pasagjer në automjet. Kurse dy personat e tjerë mbetën të plagosur. Ata janë të dy 21 vjeç dhe sipas mediave italiane raportohet se ndodhen jashtë rrezikut për jetën. Në vendngjarje shkuan forcat e zjarrfikëses, të cilët bënë të mundur nxjerrjen e të rinjve nga makina.
Nga hetimet paraprake dyshohet se aksidenti mund të jetë shkaktuar nga një pakujdesi e shoferit ose ky i fundit mund të ketë humbur kontrollin pasi e kishte zënë gjumi në timon.
Brenda 24 orëve, ky është aksidenti i dytë në Itali ku viktimat janë me origjinë shqiptare. Të shtunën, në zonën e Riviera Berica humbi jetën 40-vjeçari Luan Hakrama, baba i tre fëmijëve. Makina e tij u përplas me një automjet tjetër.
