Nga Boldnews.al
Gjykata për Krime të Rënda ka mbajtur dy standarte të ndryshme në hetimin e ish-zyrtarëve të dyshuar si bashkëpunëtorë me narko-trafikantët Habilaj, duke favorizuar ndjeshëm ish-ministrin e Brendshëm, Saimir Tahiri.
Ish-politikani i lartë i Partisë Socialiste, pjesë e kabinetit qeveritar “Rama 1” dhe ish-deputet, sot i hetuar për favorizimin e kushërinjve të tij Habilaj, “fitoi” në përballjen e javës së kaluar kundër Prokurorisë, nga e cila kërkonte mbylljen e veprimeve proceduriale ndaj tij.
Gjykata për Krime të Rënda e pranoi kërkesën e Saimir Tahirit dhe urdhëroi Prokurorinë që të mbylli hetimet brenda datës 10 Mars 2019, pavarësisht se prokurorët pretendojnë se janë ende në pritje të provave nga autoritetet fqinje.
Ndërkohë, paraditen e së Enjtes, e njëjta gjyqtare ka refuzuar kërkesën e ish-drejtorit të Policisë së Vlorës, Jaeld Çela, i dyshuar për bashkëpunim me narko-trafikantët Habilaj, në të njëjtin procedim penal me Saimir Tahirin.
Prokurorët e çështjes vendosën shtyrjen e hetimeve për Jaeld Çelën, njëlloj si për Tahirin, për shkak të pritjes së letër-porosive. Në këtë rast, gjykata e vlerësoi të pranueshme kërkesën e Prokurorisë dhe rrëzoi kërkesën e ish-kryepolicit të Vlorës për mbylljen e hetimeve.
Standarti i dyfishtë, i ndjekur nga gjykata, është qartësisht i dukshëm. Gjykata nuk lejon vijimin e hetimeve për Saimir Tahirin, ish-zyrtarin e lartë të Partisë Socialiste. Ndërkohë, për Jaeld Çelën, i cili është në të njëjtat pozita proceduriale me ish-ministrin e Brendshëm, gjykata vendos që hetimet ndaj tij të vijojnë ende.
Saimir Tahiri dhe Jaeld Çela dyshohen nga Prokuroria që janë pjesë e aktivitetit të përbashkët për favorizimin e trafikut të narkotikëve nga grupi kriminal i drejtuar nga kushërinjtë e ish-ministrit të Brendshëm.
