Parlamenti gjerman me shumicë dërrmuese ka votuar për njohjen si gjenocid të “vrasjeve të 1.5 milionë armenëve në 1915 nga Perandoria Osmane”. Thuajse të gjithë deputetët votuan për rezolutën, në debatin që zgjati rreth një orë. Presidenti i parlamentit Norbert Lammert, tha se vetëm njëri ishte kundër dhe njëri abstenoi njofton Der Spiegel.
Një rezolutë të ngjashme ka votuar edhe Franca, ndërsa edhe Vatikani ka njohur vrasjen e armenve gjatë Luftës së Parë Botërore si gjenocid kundër një populli. Turqia në anën tjetër ka kundërshtuar dhe kërcënuar shtetet të cilat votojnë një rezolutë të tillë, me pretekstin se nuk ka pasur vrasje në masë të armenëve, por vetëm shpërngulje të tyre, shkruan botasot.info. Shefi i qeverisë turke Binali Yildirim e ka quajtur rezolutën “qesharake”.
Gjatë votimit nuk morrën pjesë kancelarja gjermane Angela Merkel, ministri i jashtëm Frank-Walter Steinmeier si dhe shefi i SPD, Sigmar Gabriel.
Disa ekspertë hedhin frikën se një rezolutë e tillë do tensiononte marrëdhëniet mes Turqisë dhe Gjermanisë, që mund të vijë deri te zhvleftësimi i marrëveshjes rreth refugjatëve.
