Shkrimtari Agron Tufa ka publikuar disa dokumente, që tregojnë dy shkrimtarët e tjerë që kanë bërë ekspertizën poetit Visar Zhiti, ekspertizë e cila e dërgoi në burg.
Në dokumente e publikuara nga Tufa, shkrimtarët që i bënë ekspertizën Zhitit ishin Pandeli Koçi dhe Ramazan Vozga.
“Një pyetje që duhet ngritur. Këta që kanë emrat poshte akt-ekspertizës, që çoi në burg poetin Visar Zhiti, a u detyrohen lexuesve një shpjegim, se si ndodhi?
Meqë jane figura publike dhe i shohim nëpër tubime, apo jo? Të mos thonë: i kemi sqaruar këto gjëra me Visarin (kjo është tjetër gjë), por të na sqarojnë njëherë e mirë ne, publikisht (dhe kjo është një gjë krejt tjetër)… Përndryshe, pyetjeja mbetet e ngritur, sapo shfaqet prezenca e tyre në publik”, shkruan Tufa në postimin e tij.
