Kreu i PDIU-së Shpëtim Idrizi, në fjalën e mbajtur në seancën plenare kërkoi një shpjegim në lidhje me arsyet e vizitës së ministrit të Jashtëm grek në Shqipëri. Idrizi theksoi se Greqia duhet të heqë dorë nga ligji i luftës dhe të kërkojë falje për gjenocidin ndaj çamëve.
“Kam vendosur të flasë sot për një arsye kryesore. Për pak ditë ministri i Jashtëm i Greqisë do vizitojë Shqipërinë. Nuk dua të helmoj atmosferën midis dy vendeve tona. Por intimidimi në kompleks nuk na ka ndihmuar që të kalojmë këto probleme. Unë jam i vetëdijshëm për qasjen dinjitoze, për marrëdhënien me fqinjin tonë.
Unë e vlerësoj përmendjen e çështjes çame si çështje për t’u zgjidhur. Greqia në mënyrë të paprecedentë mbajti jo thjesht ligjin e luftës, por edhe gjendjen e luftës.
Pse është mbajtur në këmbë ligji i luftës? Pasi ka dashur të mbajë jugun e Shqipërisë, të bllokojë pronat e shqiptarëve. Edhe pas nënshkrimit të traktit të miqësisë rreth 20 vjet më parë, mbajti ligjin e luftës.
Nuk lejohet lëvizja e lirë e shqiptarëve të Çamërisë. Greqia nuk spastroi vetëm shqiptarët e Çamërisë, por edhe sllavët dhe hebrenjtë.
Ne nuk kërkojmë asgjë anti-historike. Ne kemi pasur njësitë tona partizane në Greqi dhe batalionin Çamëria në Shqipëri.
Greqia duhet të heqë dorë nga ligji i luftës, të kërkojë falje për gjenocidin ndaj çamëve. Çamët nuk hyjnë dot as sot në Greqi, sepse në pasaportën e tyre është shkruar Çamëri”, deklaroi Idrizi.
Bushati: I gatshëm për çdo lloj komunikimi që nuk cënon marrëdhëniet tona diplomatike
Në përgjigje të deklaratës së kreut të PDIU lidhur me çështjen çame, ministri i Jashtëm, Ditmir Bushati u shpreh i gatshëm për çdo lloj komunikimi lidhur me këtë çështje që nuk cenon marrëdhëniet tona diplomatike.
“E vlerësoj kontributin tuaj politik, qytetar, individual dhe të gjitha dijet e akumuluara ndër vite të njerëzve të komunitet çam. Ky 45-vjetor i rivendosjes së marrëdhënieve me Greqinë është rast i mirë për vlerësuar marrëdhëniet aktuale dhe për të të vendosur sfidat e ardhshme. Unë jam i gatshëm për çdo lloj komunikimi që nuk cenon marrëdhëniet tona diplomatike”, tha Bushati.
