Ministrja e Drejtësisë, Etilda Gjonaj në një dalje për mediat komentoi vendimin e tre ditëve më parë ndaj të pandehurit Dritan Dajti, duke paralajmëruar qëndrim të ashpër ndaj gjyqtarëve të cilët vendosin t’i heqin dënimin e përjetshëm.
Në deklaratën e saj i bëri thirrje Komisionit të Pavarur të Kualifikimit dhe Operacionit Ndërkombëtar që të kenë parasysh këto vendime që lirojnë bandat dhe të marrin masa ndaj gjyqtarëve që mundësuan uljen e dënimit.
Në deklaratën e saj, ministrja e Drejtësisë tha se mbështet Prokurorinë e Përgjithshme në qëndrimin e saj për ta ankimuar reduktimin e dënimit për Dritan Dajtin.
Ky reagim vjen tre ditë pasi Dritan Dajti, i akuzuar për vrasjen e katër efektivëve të Grupit të Operacioneve Speciale i shpëtoi dënimit me burgim të përjetshëm, pasi pesë gjyqtarë nga gjykatat e Apelit të Rretheve vendosën të pranojnë gjykimin e shkurtuar, duke e dënuar Dajtin me 25 vjet burgim.
