Nga Boldnews.al
Abdullah Skënderi nga Ksamili, personi që akuzon për shkatërrim prone me zjarr dhe eksploziv pronarin e lokalit të njohur “Orange” në Sarandë, Spiro (Evo) Ilijadhi, i ka shpëtuar mbrëmjen e së Enjtes një agresioni të rëndë fizik, që mund të ishte shoqëruar me pasoja fatale.
Kallëzuesi Skënderi ka qenë në drejtim e mjetit të tij tip furgon, kur tre automjete me disa djem të rinj, kanë tentuar t’i bllokojnë rrugën dhe ta sulmojnë. Abdullah Skënderi ka identifikuar mes agresorëve edhe vetë të kallëzuarin prej tij, Evo Iljadhi, i cili ka pasur në dorë një shufër hekuri.
Shtetasi Skënderi ka arritur t’i shpëtojë bllokimit dhe agresorët janë kthyer në mjetet e tyre, pa e dëmtuar “objektivin” e tyre.
E gjithë skena është filmuar nga kamerat e sigurisë në disa objekte të zonës, videon e të cilave e ka siguruar në mënyrë ekskluzive “Boldnews.al”. Siç shihet nga pamjet, furgoni i drejtuar nga Abdullah Skënderi është duke dalë nga një rrugicë, kur tre automjete i bllokojnë rrugën.
Nga automjetet dalin disa persona, ndër të cilët Skënderi shquan të kallëzuarin prej tij, Evo Iljadhi, me veshje të kuqe, i cili mban një shufër hekuri në dorë. Po ashtu, pavarësisht se në pamje nuk dallohet shumë qartë, krijohen dyshime që një prej shoqëruesve të Iljadhit ka pasur një pistoletë në dorë.
Fatmirësisht, ngjarja nuk është shoqëruar me pasoja dhe agresorët janë larguar pa arritur qëllimin e tyre. Menjëherë pas kësaj ngjarjeje, Abdullah Skënderi ka njoftuar Policinë, e cila ka shoqëruar disa persona të dyshuar. Deri mesditën e së Premtes nuk kishte asnjë arrestim për këtë ngjarje, ndërkohë që burime nga grupi hetimor deklaruan për “Boldnews.al” se po kryhen hetime intensive.
Konflikti ndërmjet Abdullah Skënderit dhe Spiro (Evo) Iljadhit ka nisur në në fillim të muajit Dhjetor 2018. Shtetasi Skënderi ka pasur një njësi shërbimi në zonën e Ksamilit, pranë tre ishujve. Pranë godinës së tij të shërbimit, shtetasi Spiro (Evo) Iljadhi po synon të zgjerojë aktivitetin e tij. Iljazhi është pronari i lokalit të njohur “Orange” në Sarandë dhe biznesin e tij synon ta shtojë edhe në zonën e preferuar të Ksamilit.
Por, me shumë mundësi, objekti njësi shërbimi i Abdullah Skënderit, i cili gjendej përballë biznesit të tij, pengonte klientët e lokalit për të dalë lirisht në breg të detit. E, për këtë arsye, sipas Abdullah Skënderit, shtetasi Spiro Iljadhi dhe persona të tjerë, në 8 Dhjetor 2018, kanë shkatërruar me zjarr objektin që ai kishte ndërtuar.
Për këtë ngjarje, Abdullah Skënderi ka denoncuar në polici shkatërrimin me zjarr të objektit njësi shërbimi. Por, nga kontaktet që ka zhvilluar me “Boldnews.al”, kallëzuesi Skënderi deklaron se Policia nuk ka kryer asnjë veprim, as në momentin e ngjarjes dhe as më pas, duke mos i arrestuar apo shoqëruar agresorët.
Prej fillimit të Dhjetorit, raportet ndërmjet Skënderit dhe Iljadhit janë acaruar ndjeshëm. Pronari i lokalit “Orange” rezulton që ka lidhje të fuqishme me zyrtarë lokalë të Sarandës, por edhe në Tiranë.
Në lokalin e tij, Partia Socialiste e qytetit organizon shpesh aktivitete kulturore. “Boldnews.al” ka publikuar më parë pamje të “super-deputetit” socialist, Alket Hyseni, duke festuar Vitin e Ri, së bashku me të rinjtë fresh-istë në lokalin “Orange”.
Rezulton gjithashtu se Spiro (Evo) Iljadhi ka lidhje edhe në Prokurorinë e Sarandës. Prokurori që hetoi për disa javë kallëzimin e Abdullah Skënderit kundër Spiro Iljadhit, Lorenc Mërkuri, ka lidhje të ngushta me vëllain e tij. “Boldnews.al” ka publikuar më parë disa foto, ku prokurori Mërkuri dhe vëllai i të hetuarit prej tij, duket që kanë afrimitet shumë të madh.
Këto lidhje të fuqishme të Spiro Iljadhit duket se kanë ndikuar që autoritetet shtetërore të mos marrin asnjë masë ndaluese ndaj tij.
