Tre ish-ministrat e drejtësisë Ylli Manjani, Petrit Vasili dhe Gazmend Bardhi do të merren në pyetje nga Prokuroria e Tiranës si persona që kanë dijeni për ngjarjen. Bëhet fjalë për pesë tendera të zhvilluara nga ky institucion përgjatë viteve 2016-2017.
Dy të parët, Manjani dhe Vasili janë në verifikim edhe mbi përgjigjësitë për këto tendera, ndërsa Bardhi do merret në pyetje si personi i parë që denoncoi një prej tenderave që lidhet me aparatët e mbikëqyrjes elektronike, ose ndryshe byzylykët e e kontrollit ndaj të dënuarve me shërbim prove.
Ndaj zyrtarëve dhe ish-zyrtarëve të Ministrisë së Drejtësisë kishte nisur prej muajsh një hetim, i cili u finalizua ditën e martë me caktimin e masave të sigurisë për 12 ishzyrtarët. Ndërsa disa prej tyre ishin thirrur pak kohë më parë për t’u marrë në pyetje.
Mësohet se njëri nga të arrestuarit, drejtori i Shërbimeve Ekonomike dhe Mbështetëse në këtë ministri, Aurel Lamçe, që njëkohësisht ishte i komanduar edhe si sekretar i përgjithshëm, është shoqëruar mbrëmjen e së martës nga oficerët e Antikrimit Ekonomik.
Nën masë sigurimi “Arrest shtëpie” është dhe ish-sekretarja e përgjithshme e Ministrisë së Drejtësisë, Juliana Hoxha. Ndërkohë, në burg janë edhe dy ekspertë të IT, Lysien Ali dhe Arlind Alika.
