Kreu i Federatës Shqiptare të Futbollit, Armand Duka u zgjodh sot anëtar i Komitetit Ekzekutiv të UEFA-s në kongresin e mbajtur në Romë, duke siguruar 36 vota nga 55 të mundshme për një mandat 4 vjeçar. Kjo është hera e parë që futbolli shqiptar do të përfaqësohet nga presidenti Duka në qeverinë europiane.
Përveç prestigjit, puna e re pritet t’i sjellë të ardhura të konsiderueshme Dukës, që do të përfitojë një rrugë vjetore prej 160 mijë eurosh, që do të thotë se në total do përfitojë 640 mijë euro.
Në një postim në rrjetin social ‘Facebook’, Duka u shpreh i lumtur, duke shtuar se kjo është një arritje e madhe edhe për futbollin shqiptar.
“Nga sot më është besuar detyra e anëtarit të Komitetit Ekzekutiv të UEFA-s. Emocion i papërshkrueshëm, fitore e madhe për futbollin e vendit tim. Duhet të falenderoj të gjithë kolegët e federatave anëtare, që më votuan në garën për një vend në Komitetin Ekzekutiv të UEFA-s. Një besim dhe një përgjegjësi e madhe për mua dhe futbollin shqiptar. Jam shumë i nderuar që për herë të parë në histori më takon mua të përfaqësoj në pozicionin më të lartë qeverisës së UEFA-s”, deklaroi Duka.
Duka kandidoi kundër 8 kundërshtarëve për 7 vende, pasi Boranbajev i Kazakistanit kishte vendosur që të tërhiqte kandidaturën e tij një ditë para. Kreu i FSHF-së u rendit në vendin e 6-të në bazë të votave duke lënë pas Andri Pavelkon e Ukrainës.
VOTAT
Shandor Csanai – Hungari 49
Luis Rubiales – Spanjë 47
Davor Shuker – Kroaci 47
Fernando Gomes – Portugali 45
Jesper Mëler Kristensen – Danimarkë 40
Armand Duka – Shqipëri 36
Andri Pavelko – Ukrainë 27
