Këshilli Mbikëqyrës i Bankës së Shqiërisë, në mbledhjen e tij të fundit ka miratuar paraprakisht zotërimin e 88.95% të aksioneve me të drejtë vote të kapitalit aksionar të Bankës Tirana sh.a. nga Balfin sh.p.k. dhe 9.88% nga Komercijalna Banka AD Skopje. Banka e Shqipërisë ka vënë si kusht paraqitjen në Bankën e Shqipërisë të miratimit të Hellenic Financial Stability Fund (HFSF) për shitjen e aksioneve të Bankës Tirana sh.a.
Më herët edhe Autoriteti i Konkurrencës ka dhënë autorizimin për shitjen e 98,83% të aksioneve të Tirana Bank SH.A. nga Piraeus Bank SA te grupi më i madh në vend, Balfin SH.P.K., dhe Komercijalna Banka AD Skopje, ndërsa ka vendosur dhe disa kushte dhe detyrime për blerësit, si zbatimin e kushteve të pabarabarta për veprime tregtare të njëjta me palët, duke i vendosur ato në gjendje të pafavorshme konkurrence; Të mos vendosë kushte për lidhjen e kontratave me palët e tjera, që këto të fundit të pranojnë detyrime shtesë, të cilat për vetë natyrën e tyre ose sipas praktikave tregtare, nuk kanë lidhje me objektin e kontratave në fjalë; Të mos ushtrojë veprimtari bankare ose financiare me dhe në përfitim të personave të lidhur me të; Transaksioni të sigurojë eficencë ekonomike dhe të japë siguri mbi qëndrueshmërinë e marrëdhënieve të punës së stafit ekzistues të Tirana Bank SH.A.
Transaksioni
Banka e Pireut në Greqi njoftoi zyrtarisht në fillim të gushtit 2018 se ka hyrë në një marrëveshje me Grupin Balfin dhe Komercijalna Banka, për shitjen e aksioneve të degës së saj në Shqipëri, Tirana Bank.
Shuma totale në konsideratë arrin në 57.3 milionë euro për 98.83% të aksioneve të Bankës Piraeus në Tirana Bank. Balfin është aksioner i shumicës me 88.95% të totalit.
Tirana Bank është banka e shtatë më e madhe në vend. Sipas të dhënave të Shoqatës së Bankave, totali i aktiveve të bankës ishte rreth 78 miliardë lekë në fund të tremujorit të tretë 2018, ose rreth 5.3% e totalit të aktiveve në sistem. Banka ka 3.9% të stokut të kredive dhe 4.8% të depozitave dhe kishte një humbje prej 806 milionë lekë për 9 mujorin 2018, sipas të dhënave nga Shoqata e bankave. Numri i punonjësve ishte 429 në fund të shtatorit, teksa banka ka 39 degë. Banka është e mirëkapitalizuar, me një kapital aksioner prej 13 miliardë lekësh në fund të tremujorit të tretë.
Kjo është banka e dytë me kapital grek që shitet, pasi NBG u ble në muajt e parë të 2018-s nga Abi bank. Abi Bank kishte shprehur interes edhe për blerjen e Tirana Bank. /Monitor/
