Një grup ligjvënësesh demokrate, të gjitha të veshura me të bardha, shpërthyen në duartrokitje kur Presidenti Trump vuri në dukje numrin rekorde të grave që janë tani në Kongres.
“Fiks një shekull pasi Kongresi miratoi ndryshimin kushtetues që u jepte grave të drejtën për të votuar, ne kemi më shumë gra se asnjëherë më parë që shërbejnë në Kongres ” tha Presidenti Trump.
Rrobat e bardha ishin simbol i lëvizjes amerikane të të drejtës së votimit që i dha grave të drejtën për të votuar 100 vite më parë, por dhe shenjë solidarizimi me gratë në mbarë Amerikën dhe të drejtat e tyre.
Presidenti i Shteteve të Bashkuara, Donald Trump mbajti fjalimin e tij të dytë mbi gjendjen e vendit. Fjalimi tradicionalisht përfshin një pasqyrë dhe një listë të përparësive që do të ndjekë administrata amerikane. Presidenti Trump preku çështjet më të debatuara gjatë presidencës së tij, si emigracioni dhe ndërtimi i murit me Meksikën, buxheti i mbrojtjes së Nato-s dhe tërheqja nga një traktat i Luftës së Ftohtë.
