Saimir Tahiri, ish-ministri i Brendshëm ditën e sotme ka mbërritur në Gjykatën e Krimeve të Rënda i shoqëruar nga avokati i tij Maks Haxhia. Tahiri ka ankimuar zgjatjen e afatit të hëtimeve nga ana e Prokurorisë së Krimeve të Rënda, duke kërkuar që çështja të shkoj në gjykatë.
Gjyqëtarja që do të shqyrtojë kërkesën e tij do të jet Liliana Baku.
Ish-ministri I Brendshëm ka qenë në hetim nga prokuroria italiane që prej datës 27 tetor 2017 nga prokuroria e Katanias me akuzën e trafikimit të drogës mbi përgjimet e çështjes Habilaj.
Më herët Prokuroria e Krimeve të Rënda njoftoi se do të zgjasë edhe me tre muaj afatet e hetimit për ish-ministrin Saimir Tahiri. Shkak për zgjatjen e hetimeve është bërë letër-porosia që autoritetet shqiptare i kanë dërguar Malit të Zi dhe Katanias. Përgjigjja ende nuk ka ardhur dhe dosja nuk mund të dërgohet për gjykim nëse nuk ka përfunduar procesi i hetimit.
Sipas përgjimeve të kryera nga organi i akuzës italiane, flitej për 30 mijë euro që grupi Habilaj kishte për t’i dhënë një personi me emrin Saimir dhe bizhuteri gruas së tij. Pavarësisht kësaj, nuk ka prova të mjaftueshme që e përfshijnë Tahirin në aktivitetin kriminal në rrjetin kriminal të Habilajve.
Për pasojë, autoritetet italiane kërkuan mbylljen e çështjes ndaj ish-ministrit të Brendshëm. Pak javë më parë Tahiri depozitoi në prokurorinë e Krimeve të Rënda edhe vendimin e prokurorisë së Katanias.
Grupi Habilaj u vu në hetim nga prokuroria e Katanias ku aktualisht i gjithë grupi është dërguar në gjykim me akuzën e trafikut të tonelatave kanabis dhe disa armë kallashnikov në Itali. Banda kriminale drejtohej nga Moisi Habilaj, ku Prokuroria e Katanias kërkon 18 vite burg dhe një shekull për të gjithë anëtarët e bandës së tij.
