Qeveria ka bërë publik një bilanc lidhur me paratë që iu janë kursyer shqiptarëve pas mbylljes së kazinove elektronike dhe pikave të basteve sportive.
Zëdhënësja e Qeverisë deklaroi se në janar 2018 në bastet sportive dhe kazinotë elektronike janë shpenzuar zyrtarisht 13 milionë dollarë, ose 1.3 miliardë lekë, dhe në rast se do të shtonim projeksionin e aktivitetit të bixhozit në të zezë, atëherë jemi në rreth 35 milionë dollarë shtesë.
Sipas saj, referuar shifrave, për shkak të ndalimit të bixhozit, afro 50 milionë dollarë janë kursyer nga shtëpitë e shqiptarëve.
“Rezultojnë të mbyllura, sipas bazës së të dhënave të Drejtorisë së Përgjithshme të Tatimeve dhe Autoritetit të Mbikëqyrjes së Lojërave të Fatit, 4364 adresa ku zhvillohej veprimtari bixhozi.
Në anën tjetër, në dhjetor-janar rezultojnë të regjistruara 2688 biznese të reja, të vogla, ku një pjesë e konsiderueshme janë biznese të krijuara në mjediset e basteve sportive dhe kazinove elektronike.
Krijimi i bizneseve të reja në ish-mjediset e bixhozit është dëshmia më e qartë se si ky ligj po rezulton në favor të shëndoshjes së ekonomisë dhe çlirimit të familjeve shqiptare nga një barrë e rëndë ekonomike, sociale dhe psikologjike”, tha Spiropali.
