Deputeti demokrat Ervin Salianji u shpreh mbrëmjen e sotme se prokuroria është përdorur politikisht në rastin e hetimit të Agron Xhafajt, vëllait të ish-ministrit të Brendshëm, Fatmir Xhafaj.
Salianji vuri theksin se hetimet u kryen nga persona që ishin vartës të Xhafajt, ndërkohë që nën hetim ishte vëllai i tij.
I ftuar në emisionin “5 pyetjet nga Babaramo”, Salianji, u shpreh se prokuroria po e varros këtë dosje.
Sipas deputetit të PD-së, pas paraqitjes së përgjimit, vëllai i ish-ministrit të Brendshëm, është në burg, ku ishte dënuar, por prej 14 vjetësh ishte i lirë.
“Është venitur si çështje për shkak edhe të largimit të Fatmir Xhafajt. Për gazetarin dhe për mua janë shtyrë hetimet edhe për tre muaj. Ajo ishte thjesht një manovër e PS dhe e Fatmir Xhafajt për t’i bërë presion opozitës, duke goditur në atë moment.
Unë isha deputeti që kisha më shumë denoncime ndaj qeverisë dhe ishte një mënyrë për t’i mbyllur gojën kujtdo që godiste qeverinë. Edhe me të akuzuarit e tjerë është e njëjta histori, janë zgjatur me tre muaj hetimet. Unë e kam ankimuar si vendim, por edhe gazetari gjithashtu e ka ankimuar.
Ministri jo vetëm i dha mbrojtje të vëllait si drejtues i një bande, por edhe sajoi një dëshmitar, duke përdorur drejtorin e Policisë.
Është një varr bosh i drejtësisë, duke shkuar drejt mbylljes së një afere të përfshirjes së mafies në punët e shtetit.
Fredi Alizoti ndodhet në burg sepse ka mashtruar për llogari të Fatmir Xhafajt. Tjetri, Albert Veliu (Babalja) ndodhet në Bruksel ku ka kërkuar azil, ndërsa i ka bërë një shërbim të madh publikut”, tha Salianji.
