Plot 8 lojtarë të Kamzës, refuzuan ditën e sotme të zbrisnin në fushën e lojës për ndeshjen ndaj Partizanit, me arsyen se nuk janë likuiduar rrogat e tyre.
Pas ndeshjes, trajneri i Kamzës, Ernest Gjoka, pranoi se në skuadër ka probleme të mëdha dhe lojtarët janë të pamotivuar për shkak të problemeve financiare dhe krizës mes presidentit Qarri dhe kryebashkiakut Mziu.
“Unë mendoj se gjendja është kjo që është. Uroj dhe shpresoj që njerëzit që na drejtojnë, ta zgjidhin sa më shpejt. Ne mundohemi të punojmë, por kaq është mundësia. Duhet zgjidhur situata. Njerëzit duhet të mbajnë familjet dhe kanë nevojë për financa. Dihet që dy drejtuesit kanë prishur marrëdhëniet, dhe kjo ndikon te skuadra.” – tha Ernest Gjoka.
Por sipas vetë klubit, kjo nuk do të thotë se ekipi është dorëzuar në luftën për mbijetesë. Me një reagim në rrjetet sociale, klubi ka akuzuar mediat se po e teprojnë me sjelljen e tyre ndaj Kamzës, ndërsa nuk shohin të gjitha ato që po pëson në kurriz ky klub në këtë periudhë, duke e fundosur më shumë se braktisja që i ka bërë Bashkia.
REAGIMI I KAMZËS
Duke lexuar lajmet e fundit ku aludohet dhe akuzohet skuadra jonë, habitemi kur fusha e blertë tregoi një futboll burrëror dhe të luftuar.
Problemet e shumta që kemi, të cilat na kanë ndikuar në gjendjen tonë, sigurisht që na kanë krijuar probleme.
Nuk ka asnjë habi që të kemi lojtarë të dëmtuar si Plaku, Fukui dhe të tjerë, apo afrimet e fundit që ende nuk kanë gjendjen optimale për aktivizim. Por gjithashtu i mirëkuptojmë edhe lojtarët tanë që nuk ishin në gjendje psikologjike të zbrisnin në fushën e lojës, pasi edhe ata kanë hallet e tyre dhe janë njerëz si të gjithë ne.
Mediat merren me formacionin tonë, por si klub jemi krenarë për ata lojtarë të rinj që sot treguan se janë e ardhmja e klubit tonë.
Mediat kanë nisur të bëjnë rolin e matrapazit, pasi merren me aludime dhe nuk merren me arbitrat e ndeshjes ndaj Tiranës që vendosën në mënyrë të njëanshme atë sfidë me gjykimin skandaloz. Ne nuk komentuam sfidën ndaj Tiranës duke ia lënë në dore analistëve dhe mediave, por pamë një reagim të vaket, jo realist dhe tendencioz.
Ata që kërkojnë të hedhin baltë mbi ekipin tonë më parë të “pastrojnë baltën” që i ka zënë syzet e tyre për të parë realitetin e turpshëm në fusha të tjera ku sundojnë pazaret dhe klanet e turpshme anti-Kamza, por edhe dhuna, “cilësi” që kurrë s’ka qenë pjesë e jona, pasi Kamza ka qenë gjithmonë “Fair Play”.
Ndodhemi në një moment të vështirë por kjo s’do të thotë se jemi dorëzuar. Do ta shihni të gjithë forcën tonë, pasi nuk do të dorëzohemi ndaj asnjë pazari që bëhet në kurrizin tonë dhe ndaj asnjë maskarade të kurdisur ku dikush shikon i qetë këtë llumnajë të madhe.
I lutemi mediave të transmetojnë realitetin e një skuadre të lënë në baltë nga Bashkia, të cilën familja Qarri s’do ta lë kurrë në këtë batak. Të një skuadre që mes shumë halleve respekton garën duke luajtur burrërisht edhe me djemtë e rinj të cilët ju në vend t’i ekspozoni dhe inkurajoni, i dekurajoni me zhgarravinat tuaja.
