Maqedonia pritet të nënshkruajë të mërkurën e javës së ardhshme, në selinë e Aleancës në Bruksel, protokollin për pranimin në NATO.
Sikundër raportohet, ministri i Punëve të Jashtme i Maqedonisë do të nënshkruajë protokollin e pranimit në prani të ambasadorëve të vendeve anëtare të NATO-s.
Teksti u miratua në të ashtuquajturën “procedurë të qetë”, të hënën e kaluar.
Pas nënshkrimit të Protokollit, ky dokument duhet të ratifikohet në parlamentet kombëtare të 29 vendeve anëtare të NATO-s.
Nëse çdo gjë shkon sipas planit, ministrja e Mbrojtjes, Radmila Shekerinska do të marrë pjesë për herë të parë në një takim ministror të vendeve anëtare të Aleancës më 13 shkurt, por pa të drejtë vote derisa Maqedonia të bëhet anëtare e plotë.
Sipas burimeve të EurActiv, teksti zyrtar i protokollit të pranimit u miratua të hënën dhe 29 përfaqësues të përhershëm të NATO-s po presin për miratimin e vendeve të tyre për ta nënshkruar atë.
“Greqia dëshiron ta ratifikojë protokollin deri më 8 shkurt”, tha burimi, duke shtuar se Athina ndoshta do të jetë e para që do të hapë derën e NATO-s për Maqedoninë.
Qeveria gjermane njoftoi të enjten vendimin e saj për pranimin e Maqedonisë në NATO dhe u zotua që procesi i pranimit të përfundojë shpejt.
Njoftimi i qeverisë gjermane thotë se hyrja e Maqedonisë në Aleancë do të japë një kontribut të rëndësishëm në sigurinë e zonës euroatlantike dhe do të sigurojë gjithashtu një shtysë të rëndësishme për stabilizimin e mëtejshëm të Ballkanit Perëndimor.
