Nga Boldnews.al
Pasi mori disa goditje të një pas njëshme nga “Zëri i Amerikës” për lidhjet e bashkëpunëtorëve të tij me krimin e organizuar dhe për vjedhjen e votave, Edi Rama merr një shuplakë të rëndë nga Departamenti Amerikan i Shtetit, duke e nxjerrë kryeministrin e Shqipërisë një mashtrues të rëndomtë.
Në seancën plenare të së Enjtes, Edi Rama, duke iu drejtuar paraardhësit të tij, Sali Berisha, i bëri një pyetje tendencioze: “A mund të kalosh oqeanin me DASH”. Ishte një lojë fjalësh ajo e kryeministrit, të cilën, megafonët e tij mediatike ia shpjeguan kuptimin, duke e “përkthyer” se ajo fjali lidhej me një ndalim të mundshëm të udhëtimit të Sali Berishës drejt Shteteve të Bashkuara të Amerikës.
Por, Departamenti Amerikan i Shtetit (DASH), në një përgjigje zyrtare për kolegun Erl Murati të “Gazeta Shqiptare” është përgjigjur me diplomaci se emrat e personave shqiptarë që iu është ndaluar udhëtimi për në SHBA janë të listuar në faqen zyrtare të atij institucioni.
Në atë listë mungon emri i Sali Berishës, gjë që do të thotë se, me një sjelle politikisht korrekte, Departamenti i Shtetit përgënjeshtron kryeministrin Edi Rama. Ky i fundit, me nerva të tendosura në sallën e Parlamentit, foli thuajse i bindur, madje me kënaqësi, që “Berisha nuk kalon dot oqeanin me DASH”.
Por, zyrtarisht, Departamenti Amerikan i Shtetit i jep fund diskutimeve, aludimeve dhe analizave të personave që sillen si gazetarë të lirë dhe figurojnë në borderotë qeveritare.
Pas deklaratës në Parlament, Edi Rama u largua, duke njoftuar seancën se ai priste një telefonatë drejtëpërdrejtë nga Shtëpia e Bardhë. Në mesditën e së Enjtes, ai vetë njoftoi në rrjete sociale se kishte komunikuar në telefon me John Bolton, këshilltarin e Sigurisë së Presidentit Amerikan, Donald Trump për “Shqipërinë dhe për rajonin”, sicc shkruante vetë telegrafikisht.
Biseda mes drejtuesve të lartë politikë është konfidenciale dhe detajet e saj nuk mund të bëhen publike. Gjithësesi, nëse ajo telefonatë ka qenë e suksesshme apo jo, dallohet në humorin e kryeministrit, i cili nuk e ka aspak problem t’i fshehë emocionet.
Pas debatit të paradites me Berishën dhe pas telefonatës me John Bolton, Edi Rama u shfaq në mbrëmje në një video-monolog në rrjete sociale, ku, me një fjalor shumë të rënduar, iu rikthye temës së preferuar të ditës-sharjeve për ish-kryeministrin Berisha.
Video-monologu i Ramës përkoi me orarin e emisioneve prime-time në televizionet kryesore të vendit. Blendi Fevziu, në emisionin e tij “Opinion” ku po diskutohej për përgjimet e zyrtarëve të lartë të maxhorancës me anëtarë të grupeve kriminale, vendosi të lidhte live për disa sekonda video-monologun e Edi Ramës.
Të gjithë të pranishmit në panelin e emisionit, një pjesë e të cilëve dukshëm në favor të Edi Ramës, kërkuan thuajse njëzëri që Fevziu të shkëpuste lidhjen me “facebook-un” e kryeministrit.
Edi Rama nuk dukej aspak i qetë në atë video-monolog dhe mbështetësit e tij publikë, me shumë mundësi, kërkuan ndërprerjen e lidhjes, për të ruajtur sa të mundeshin imazhin e rënduar të kryeministrit.