“Ka vajt gjendja ku nuk mban uji pilafi më. Shpresa e fundit je ti, drita jeshile për këtë popull”, i është shprehur një prej fermerëve të Gjergjanit në Elbasan kryetarit të Partisë Demokratike, Lulzim Basha.
Gjatë një takimi me banorë të Shirgjanit, Gjergjanit dhe Bradasheshit, Basha mësoi rreth problematikave që po vuajnë ata.
Fermerët e Gjergjanit thanë se kanë tre vjet që nuk shohin asnjë investim për bujqësinë. Investimet e fundit në këtë zonë, thonë banorët, përsa i përket infrastrukturës bujqësore ashtu dhe asaj rrugore kanë qenë në kohën kur Basha ishte deputet i Elbasanit.
Fermer: E shikon kanalin e mbuluar me kallama atje? Është kanali që kullon gjithë parcelat atje sipër.
Basha: Sa vjet ka pa u pastruar?
Fermer: Që kur e ke pastruar ti që ishe deputet.
Basha: Subvencione jo, rritje pensionesh jo, ulje të çmimit të energjisë jo, përkundrazi e ka rrit. Rritje taksash, rritje fukarallëkut. Çfarë i bën lekët? 2.2 miliardë euro i ka vjedh për dy vite oligarkia me atë në krye. I bie 2 milionë lekë të vjetra për vit për familje.
Fermer: Ka vajt gjendja ku nuk mban uji pilafi më. Shpresa e fundit je ti, drita jeshile për këtë popull. Duhet të mbështesim, duhet të punojmë të gjithë, ti je Kryeministri i ardhshëm i Shqipërisë.
Basha: Çmimi i energjisë do të ulet për konsumatorin dhe për biznesin. Prioritet numër një do të jetë bujqësia, 150 milionë euro, nga të cilat 50 milionë euro për infrastrukturën dhe 100 milionë euro subvencione të drejtpërdrejta për fermerin.
Zoti Basha u ndal dhe në një fermë lopësh.
Banor: Njëzet lopë kam pas.
Basha: Po pse ke dhjetë tani?
Banor: Po kam dhjetë tani se si plotësoj dot kushtet, duan lekë. Qumështi shitet 300 lekë.
Basha: Subvencione a ke marrë?
Banor: Jo, jo asnjë gramë.
Basha: Ne do ta mbështesim blegtorinë me subvencione të drejtpërdrejta. Çdokush që ka bagëti, lopë, dele, dhi do të marrë për kokë subvencionet, për kokë.
Pas kërkesës së banorëve Basha vizitoi disa familje në Bradashesh. Nëntë persona banonin ne një dhomë dhe jetonin me ushqimet që u falnin të tjerët.
Banor: Më parë ne kemi punu, sa e mori ky ne kemi maru. Se ai ndërtimin e preu, ku do të shkojmë të punojmë ne? Se a të vjedhim, të vrasim?! Se kjo është, jam vetë i nëntë me një dhomë.
Banore: Kam gjashtë kalamaj, secili me nga tre kalamaj me një dhomë, janë edhe dy çunat. Unë s’kam shpi po flej tek shkallët.
Banore: Çuni pa punë, nusja pa punë, ku do të ikim djali i nënës?! Të keqen! Po ta japim me gjithë shpirt vetëm ti ta marrësh o Zot!
Basha: Familjet në ndihmë ekonomike nuk do të paguajnë taksa, as faturë energjie deri në 300 kë dhe as faturë ujë. T’i japësh pesë lekë fukarait me një dorë dhe t’i marrësh dhjetë me tjetrën, ky është krim, kjo nuk është ndihmë ekonomike.
