Qeveria holandeze ka njoftuar që dëshiron të lejojë kultivimin e embrioneve njerëzore nën kushte shumë strikte dhe të limituara, për studime shkencore, kështu duke u dhënë shpresë personave që e kanë të pamundur të bëhen prindër, shkruan The Guardian.
“Dëshirojmë të lejojmë krijimin e embrioneve njerëzore me qëllim të studimit shkencor – nën kushte shumë strikte – në mënyrë që t’ju japim mundësinë prindërve të kenë fëmijë të shëndoshë”, ka deklaruar Ministrja e Shëndetësisë në Holande, Edith Schippers, transmeton Klan Kosova.
Për me tepër ajo ka shtuar që studimet kanë të bëjnë me teknikat e riprodhimit, infertilitetin, sëmundje të lindura dhe në mënyrë specifike, personat që janë bërë infertil për shkak të trajtimeve kundër kancerit në moshë të re.
Holanda do të ndryshojë ligjet që t’ua mundësojë shkencëtarëve studimin me embrione të reja, jo vetëm me ato të mbetura nga procedurat in vitro, ndërsa rregulli që embrioni të kultivohet vetëm për 14 ditë do të qëndrojë akoma.
