Jani Alia, i dyshuar si ekzekutor i Elton Çiços, dhe Renato Milloshi, si bashkëpunëtori i tij përveç provave të tjera, janë lokalizuar edhe nga telefonat celularë.
Pasi u identifikuan nga pamjet e kamerave të sigurisë, nga targat e makinës e nga dëshmitarët, rezultuan se kishin qenë në zonën e lokal “De Niro” në kohën kur ndodhi vrasja e Elton Çiçës më 1 maj.
Ky fakt u provua me verifikimin e vendndodhjes së celularëve të të dyshuarve në kohën e kryerjes së krimit, tha një burim i Prokurorisë. Nga ana tjetër, dy personat në kërkim, sipas Policisë, nuk e kanë kaluar kufirin shqiptar. Nga shënimet në sistemin TIMS të Policisë së Shtetit, asnjëri prej tyre nuk figuron të ketë lëvizur jashtë territorit. Burimet thonë se, edhe në rrugë operative, janë siguruar informacione se ata ndodhen në Shqipëri. Kjo edhe për shkak se Jani Alia është person në kërkim nga autoritetet greke dhe rreziku që ai të arrestohet edhe jashtë vendit është shumë i madh. Sipas Policisë, deri disa ditë para se të bëhej zyrtarisht shpallja në kërkim e dy të dyshuarve, ndonëse nuk ishte arritur të shoqëroheshin për t’u marrë në pyetje, ata mbaheshin në vëzhgim në rrugë operative. Duke qenë se ishin persona të dyshuar për vrasjen e ndodhur më 1 maj te lokali “De Niro”, në Tiranë, fotografitë e Jani Alisë dhe Renato Milloshit ishin shpërndarë nëpër të gjitha vendkalimet kufitare, por edhe në komisariate të ndryshme, në mënyrë që të mos lejoheshin të dilnin nga Shqipëria. Deri dy ditë para se Gjykata e Tiranës të vendoste masat e sigurisë “arrest me burg”, në mungesë për dy të dyshuarit, Policia kishte të dhëna se ata fshiheshin në një banesë në periferi të kryeqytetit. Vendqëndrim që e ndryshuan, sapo emrat dhe fotografitë e tyre u publikuan në media.
KONTROLLET
Veprimet e para që ka kryer Policia e Tiranës, menjëherë sapo kanë marrë në dorë vendimin e Gjykatës për arrestimin e Jani Alisë dhe Renato Milloshit, kanë qenë kontrollet në banesat e të afërmve dhe miqve të tyre. Burimet thanë se të gjitha banesat e dyshimta, edhe të kushërinjve më të largët të dy të dyshuarve, në Tiranë e Tepelenë, janë mbajtur nën vëzhgim dhe janë kontrolluar, por deri tani pa rënë në gjurmët e tyre. Informacionet e qytetarëve që kanë telefonuar në numrin e vënë në dispozicion flisnin për një vendndodhje të mundshme në zonat e Progonatit dhe Lekdushit, në Tepelenë. Por, nga ana tjetër, kishte informacione edhe për disa zona periferike të Tiranës. Grupe të ndryshme vëzhgimi të forcave të rendit, por edhe të forcave speciale RENEA, prej tri ditësh janë në gatishmëri të plotë në terren, në adresa të ndryshme ku ka dyshime për vendndodhjen e tyre.
