Trupi i një gruaje të vdekur vijon të jetë ende në autobusin që u dogj plotësisht paraditen e sotme në qendër të qytetit të Krujës.
Ndërkohë, 5 persona të tjerë janë nisur në drejtim të Spitalit të Traumës në Tiranë, në gjendje të rëndë shëndetësore. Katër të lënduar të tjerë po marrin mjekimin në spitalin e Krujës.
Incidenti tragjik ka ndodhur kur një autobus me përfaqësues të Kishës Ortodokse, i nisur nga Vlora, ka qenë duke u ngjitur në maloren e qytetit të Krujës, në kuadër të një vizite turistike. Pranë qendrës së qytetit, udhëtarët e mjetit 20-vendësh, pjesa më e madhe e të cilëvë në moshë madhore, kanë konstatuar tym të errët në pjesën fundore të autobusit.
Menjëherë kanë njoftuar shoferin, i cili ka ndaluar mjetin dhe ka dalë për të parë defektin. Brenda pak momentesh, nga pjesa e poshtme e autobusit është dëgjuar një shpërthim i mbytur, shoqëruar me flakë. Nga verifikimet e para, rezulton që incidenti të jetë një defekt teknik në mjetin me të cilin po udhëtonin turistët nga Vlora.
