“Le të shkojmë vitin e ardhshëm në zgjedhje parlamentare, por edhe për pushtetin vendor”, ka deklaruar deputeti i PD-së Astrit Patozi, gjatë seancës së sotme palamentare. Këtë deklarat Patozi e ka bërë lidhur me balancën e parë të ligjit të dekriminalizimit, ku u vu re prania e elementëve të inkriminuar në Kuvend.
“Kemi arritur në një pikë ku në këtë Parlament kanë ardhur njerëz përgjegjës për krime rrënqethëse”, ka thënë Patozi, i cili ka folur për trafikantë, vrasës dhe hajdutë të shtëpive.
“Të dënuar për trafiqe kanë veshur kostume dhe drejtojnë bashkitë e vendit. Kryeministri është kampion i kërkimit me qiri i kontigjentëve kriminalë”, ka thënë Patozi, i cili ka komentuar edhe ngjarjet e fundit të verifikuara në vend.
“Ajo që ka bërë Shukriu është e pakrahasueshme me krimet e disave që drejtojnë bashkitë. Por këtu dënohen vetëm ata që dalin në televizor. Kjo është Shqipëria sot”, ka deklaruar më tej deputeti demokrat.
Sipas tij, nga kjo situatë mund të dilet vetëm përmes një reflektimi të thellë të klasës politike dhe jo lidhjes së saj me bandat.
“Duhet një reformë e plotë kushtetuese që të nisë me ligjin e ri elektoral. Le të ulemi që sot për një kontratë të re sociale, sepse ndryshe nuk zbutet tranzicioni i këtij vendi. Le ta fillojmë me zgjedhjet. Le të shkojmë vitin e ardhshëm në zgjedhje parlamentare, por edhe për pushtetin vendor”, ka sugjeruar Patozi, i cili megjithatë është shprehur skeptik për pranimin e kërkesave të tij.
Sipas tij, nuk duhet pritur që opozita të konkurrojë me bandat e veta dhe të fitojë më i forti.
“Nuk është çudi që kjo të ndodhë, sepse askush nuk parashikon se cfarë opozite do kemi nesër nëse pushteti nuk e ndryshon filozofinë e vet. Duhet reformë e plotë kushtetuese, që përfshin edhe reformën e drejtësisë dhe të mos kompleksohemi nga mungesa e kohës, pasi na u deshën 48 orë për ta përmbysur kushtetutën krejtësisht”, tha ai.
