Nga Boldnews.al
Këshilli i Lartë i Prokurorisë (KLP) pritet të dalë në 7 Janar me një vendim për rikthimin tek Krimet e Rënda të prokurorëve Besim Hajdarmataj e Olsian Çela, transferimi i të cilëve në Pogradec e Berat, me firmën e Kryeprokurores së Përkohshme, Arta Marku, u konsiderua i paligjshëm nga gjykata administrative.
Mesditën e së Premtes, KLP ka diskutuar mbi vendimet e gjykatës administrative për dy rastet dhe e ka shtyrë vendimmarrjen për në javën e parë të janarit. Burime të brendshme nga KLP deklaruan për “Boldnews.al” se, gjatë diskutimeve, ka pasur dy qëndrime të ndryshme. Disa prej anëtarëve kanë qenë dakord që Këshilli i Lartë i Prokurorisë të vendoste për rikthimin e dy prokurorëve në detyrat e tyre të mëpërshme, pranë Prokurorisë për Krime të Rënda, në zbatim të vendimit të gjykatës.
Një pjesë tjetër, kryesisht nga ata të njohur si “miqtë e Arta Markut” janë shprehur se vendimmarrja përfundimtare për rikthimin ose jo tek Krimet e Rënda të Hajdarmataj e Çelës duhet të vendosej pasi të jepet vendimi i formës së prerë nga Gjykata e Apelit. Madje, duke konsistuar në këtë qëndrim, ky “grup” ka kërkuar që apelimin e vendimit të gjykatës administrative ta dorëzoj vetë Këshilli i Lartë i Prokurorisë, pavarësisht se transferimin e paligjshëm të dy prokurorëve e ka firmosur Kryeprokurorja e Përkohshme, Arta Marku.
Pas prezantimit të këtyre dy qëndrimeve, Këshilli i Lartë i Prokurorisë ka vendosur që të dalë me një konkluzion në mbledhjen e ardhshme, më datë 7 janar 2019.
Por, menjëherë pas mbledhjes, “burime nga KLP” shpërndanë në disa media informacionin se “KLP vendosi që të apelojë vendimin për rikthimin në detyrat e mëparshme të Besim Hajdarmataj e Olsian Çelës”, pra, duke e paraqitur si “fakt të kryer” qëndrimin që kishte mbajtur në mbledhje grupi “miqtë e Arta Markut”.
Por ky “fake news”, i shpërndarë nga brenda Këshillit të Lartë të Prokurorisë, mes duket, synon që të zbusë imazhin e dëmtuar të Arta Markut, e cila u rrëzua për të disatën herë në Gjykatën Administrative.
Disa muaj më parë, Gjykata Administrative e Apelit i konsideroi “absolutisht të paligjshëm” urdhërat e Kryeprokurores së Përkohshme, Arta Marku, për pezullimin nga detyra të prokurorëve Rovena Gashi e Dritan Gani.
Në fillim të kësaj jave, gjykata administrative i konsideroi të paligjshëm urdhërat e Arta Markut për “transferimin” e prokurorëve të Krimeve të Rënda, Besim Hajdarmataj e Olsian Çela.
Këto vendime kanë vënë në pikëpyetje të mëdha aftësitë profesionale e menaxheriale të Arta Markut, e cila po synon të kandidojë për postin e Prokurorit të Përgjithshëm me mandat të plotë 7-vjeçar.
Për të “përmirësuar” disi imazhin e dëmtuar rëndë të Kryeprokurores së Përkohshme nga vendimet e fundit të gjykatës administrative, mesa duket po angazhohen “miqtë e saj” në Këshillin e Lartë të Prokurorisë.
Nëpërmjet “fake news-it” të shpërndarë prej tyre gjatë së Premtes, ky grupim ka shpresuar që të përhapë në opinion idenë që konstatimi se veprimet e Arta Markut janë të paligjshme, nuk është përfundimtar. Për këtë, sipas tyre, duhet të vendos Gjykata Administrative e Apelit. Dhe, për t’i ardhur në ndihmë deri në fund Kryeprokurores së Përkohshme, ky grupi “miqtë e Arta Markut” sugjeron që ankimin ta marrë përsipër ankimin vetë Këshilli i Lartë i Prokurorisë.
Prokurorët dhe ish-drejtuesit e Prokurorisë për Krime të Rënda, Besim Hajdarmataj dhe Olsian Çela u transferuan në muajin Shtator 2018, nëpërmjet një urdhëri të paligjshëm të Arta Markut, pas një debati procedurial të zhvilluar me drejtuesen e Krimeve të Rënda, Donika Prela, lidhur me dosjen “Shullazi”.
Të dy këta prokurorë paditën Arta Marku në gjykatën administrative e cila, në dy procese të ndryshme, vendosi më herët gjatë kësaj jave se Kryeprokurorja e Përkohshme kishte vepruar në mënyrë të paligjshme me transferimin e tyre.
