Deputetja demorake Albana Vokshi komenton ndryshimet në qeverinë “Rama 2” duke u ndalur te Arsimi dhe Kultura.
Deputetja e Partisë Demokratike është shprehur se shkarkimet e ministreve të Arsimit e Kulturës, që bëri sot kryeministri Rama, tregojnë dështimin e qeverisë.
“Shkarkimi, i ministreve Lindita Nikolla dhe Mirela Kumbaro, nga Kryeministri Rama është tregues i dështimit të qeverisë së tij në të gjitha çështjet e arsimit dhe të kulturës, si edhe konfirmim se kauzat e opozitës në këto dy fusha kanë qenë të drejta”, shprehet Vokshi.
Deputetja thekson më tej se emërimi i zëvëndësministres Besa Shahini në postin e Ministres së Arsimit, nuk është zgjidhje, pasi Shahini sipas saj është pjesë e dështimit të kësaj Ministrie nga 2017 e në vazhdim.
“Emërimi i zëvëndësministres Besa Shahini në postin e Ministres së Arsimit, nuk është zgjidhje, pasi znj. Shahini është pjesë e dështimit të kësaj Ministrie nga 2017 e në vazhdim. Emërimi i artitektes Elva Margariti në postin eMinistres së Kulturës, të vetmin kontribut për kulturën ka “avokatinë” për prishjen e Teatrit Kombëtar. Për fat të keq, këto emërime janë tregues se dështimet në këta dy sektorë do të vijojnë. Problemet e arsimit dhe kulturës nuk mund të zgjidhen më me shkarkimin e ministreve, por me largimin një orë e më parë të kryepërgjegjësit për shkatërrimin e arsimit dhe kulturës në vend, Edi Ramës!”, shprehet Vokshi.
