Futbollisti i Skënderbeut, Hamdi Salihi nuk është thirrur në Kombëtare për Europianin “Francë 2016”.
Ky lajm e ka zhgënjyer futbollistin Salihi i cili ka zhvilluar një sezon të shkëlqyer me Skënderbeun duke u shpallur kampion i Shqipërisë me bardhekuqtë dhe duke fituar edhe çmimin e golashënuesit më të mirë të kampionatit me 27 gola.
Gjë e cila e ka lënë të zhgënjyer sulmuesin shkodran që i ka dhënë shumë Kombëtares shqiptare në dhjetë vitet e fundit.
Në një prononcim për “Supersport”, nga Austria ku ndodhet duke shijuar pushimet e fundsezonit, Hamdi Salihi nuk e ka fshehur zhgënjimin e tij për këtë mungesë grumbullimi nga ajo që ishte ëndrra e tij e kahershme.
Parandjenja
“Diçka të tillë e kisha parandier këto ditët e fundit, pasi duke qenë pjesë e Kombëtares këto 10 vitet e fundit, e di se si funksionojnë gjërat për grumbullimin e lojtarëve. Lojtarët që do të grumbullohen nuk është se presin listën për ta marrë vesh, pasi njoftohen dhe kontaktohen disa ditë më parë për diçka të tillë. Unë nuk kisha marrë asnjë lajmërim dhe e kisha parandier pak këtë gjë, megjithëse kam shpresuar deri në momentin e fundit që të isha pjesë e listës, pasi besoj se me sezonin e zhvilluar, i kisha plotësuar të gjitha kriteret e nevojshme për grumbullim”, theksoi fillimisht Hamdi Salihi, duke treguar më pas keqardhjen se askush nuk e kishte kontaktuar për t’i shpjeguar përse erdhi kjo mungesë e tij në listën e Kombëtares.
