Studentet Xhulia Mema dhe Senajda Bendaj, të cilat protestojnë prej javësh për realizimin e 8-të pikave të kërkesës së tyre drejtuar qeverisë, u shprehën në Fax News se protesta do të vijojë në të njëjtën mënyrë.
Ato u shprehën se studentët nuk kanë bërë plane afatgjata për vijimin e protestës për të shmangur ndoshta edhe manipulimet që mund t’i bëjë politika asaj.
“Jemi shumë mirënjohës ndaj shqiptarëve të diasporës, ne do të jemi shumë të kënaqur t’i mirëpresim ata dhe natyrisht që do t’u bashkohemi atyre në protestën e 28-të dhjetorit që ata kanë paralajmëruar. Mbështetja nga njerëzit që jetojnë jashtë Shqipërisë është shumë e veçantë sepse ata e kanë patur një arsye që janë larguar, ndaj e ndjejnë që të na përkrahin,” – u shpreh njëra nga studentet.
Ato gjithashtu thanë se ka patur presione ndaj studentëve prindërit e të cilëve punojnë në administrë e për pasojë shumë prej tyre për shkak të frikës janë larguar nga protestës.
Studentët e ftuara në studion e Fax News treguan se ka një ndërgjegjësim të gjerë të shoqërisë në mbështetje të protestës sepse sipas tyre, të gjithë ndjehen të cënuar në një farë mënyre nga realiteti.
