Deputeti i Partisë Demokratike Enkelejd Alibeaj, foli në ‘Fax News’ në lidhje me denoncimin e sotëm të PD-së për aferën e Unazës së Re, ku biznesmeni Edmond Bego, i njohur për klidhjet e tij me PS-në, do të ndërtonte pallate në vend të shtëpive të banorëve që do të prisheshin.
Alibeaj tha se kreu i kësaj afere është vetë Edi Rama, ndërsa theksoi se ministrin Damian Gjinuri nuk e beson askush kur thotë se nuk kishte dijeni për falsifikimet e firmës që kishte fituar tenderin prej 18 milionë eurosh.
“Edmond Bego njihet, miku trafikat i Taulant Ballës, përfaqësues i krimit të organizuar. Të gjithë bashkë kanë menduar të ndajnë një sipërfaqe trualli ku minimalisht do investonin 60 milionë euro.
Marrëzia ka shkuar deri në nivele të paimagjinueshme, kanë ndryshuar planin urbanistik, kanë spostuar edhe lumin, për një investim 60 milionë euro, dhënë një përfaqësuesi të botës së krimit.
Ja, kjo është një histori e radhës, një histori korrupsioni, kriminaliteti që përbën dhe shembullin e lidhjes së krimit dhe politikës. Kjo është dhe prova e gjallë se pse është i nevojshëm vetting në politikë. Pëditë e më tepër për këdo skeptik, tashmë merr provën e radhës se çfarë qeverie kriminale qeveris vendin”, u shpreh Enkelejd Alibeaj.
Sipas tij e para që duhet të kishte reaguar duhet të ishte prokuroria, të paktën të kishte regjistruar një vepër penale. Por për këtë ai tha se nuk duhet mbajtur shpresë.
“I pari që duhet të reagojë është prokuroria, pak shpresë ka, por në një shtet europian qoftë dhe me një drejtësi e brishtë, minimalisht prokuroria duhet të regjistronte një çështje penale. Dokumentet flasin qartë por këta kanë humbur çdo lloj skrupulli. Kanë humbur çdo lloj qytetarie. Tashmë janë duke menduar se si të mbyllin frontet e protestave. Përditë e më tepër janë duke u sfiduar nga protesta e studentëve”, iu shpreh ndër të tjera Alibeaj i cili shtoi se tek Unaza vazhdojnë punimet.
“Përditë të paktën deri në tre apo katër ditë më parë, punimet vazhdojnë, firma Salillari është firma që vazhdon punimet, presin natën që të punojnë si hajdutë. Mendoni se çfarë shteti kemi, i çon natën të korruptuarit e vet edhe për të punuar edhe për të kërcëuar qytetarët”, shtoi ai.
Zgjedhjen e kreut të KLP-së Gent Ibrahimi , Alibeaj tha se është farsa e radhës dhe ëndërra për një reform reale në drejtësi, tashmë ka vdekur.
“Është farsa e radhës, drejtësia e re është zhgënjimi më i madh për qytetarët shqiptarë. Në 2016 kur u votuan me konsensus ndryshimet kushtetuese kishte shpresë për një drejtësi të pavaruar, por sot kjo shpresë ka vdekur.
Që në atë kohë përflitej se njerëzit që u angazhuan si ekspert do viheshin në krye të institucioneve të reja, sot këni provën, në krye të KLP-së është një person me afilacion politik”, u shpreh deputeti demokrat.
Sipas tij nga një drejtësi e korruptuar tashmë kemi kaluar tek drejtësia e politizuar në duart e kryeministrit Rama. Alibeaj tha se opozita kishte marrë garanci nga ndërkombëtarët se institucionet e reja të drejtësisë nuk do të ngriheshin në mënyrë të njëanshme nga maxhoranca. Por ndërkombëtarët sipas tij dështuan dhe janë pjesë e komplotiti për ta kaluar drejtësinë në duart e Ramës.
“Kjo KLP e sotme do të nxjerrë një SPAK politik dhe të korruptuar, fundi i një ëndrre, i një iluzioni të reformës në drejtësi”, tha Alibeaj.
Sipas tij ky ëhstë një regjim autokratike dhe rruga e vetme për ta larguar janë protestat. Alibeaj u shpreh dhe për kthimin e opozitës në Kuvend. Ai tha se opozita ka pasur një marrëdhënie të kushtëzuar me Kuvendin, por po kthehet pasi vetting në politikë është investim i saj, dhe sipas tij vetting do të bëhet.
“Ne kemi pasur marrëdhënie të kushtëzuar me Kuvendin. Vajtja jonë nesër është detyrim, për vettingun do të shkojmë se është interesi ynë, nesër do shkojmë edhe për çështjen e studentëve”, u shpreh ai.
Sa i përket protestave të studentëve dhe thirrjes për dialog tëkryeministrit, deputeti demokrat, theksoi se Rama po përpiqet që të fitojë kohë pasi mendon se do bjerë nervi i protestës, por sipas tij llogaritë i ka bërë gabim.
“Rama kërkon të fitojë kohë, me dialogun se mendon se shqiptarët janë njerëz emocionalë dhe do të bjerë nervi i protestës , por e ka gabim se ajo është protestë e bukës së gojës”, deklaroi Alibeaj.
