Nga Boldnews.al
Këshilli i Lartë i Prokurorisë ka zgjedhur kryetarin e saj, juristin që ka nisur karrierën në fondacionin Soros, Gent Ibrahimi. “Boldnews.al” e paralajmëroi tre ditë më parë se gara për kreun e KLP-së është e paracaktuar disa muaj më parë, kur Ibrahimi u zgjodh si anëtar i këtij institucioni, nga radhët e shoqërisë civile.
Gent Ibrahimi është një prej ekspertëve të lartë të Reformës në Drejtësi. Ai është pjesë e një numri të lartë projektesh të fondacionit Soros, i cili ishte edhe “kumbari” i Reformës në Drejtësi në Shqipëri.
Zgjedhja e tij në krye të Këshillit të Lartë të Prokurorisë ishte vendosur prej muajsh dhe formalizimi u vonua, për faktin se vetëm së fundmi u zgjodhën anëtarët prokurorë të kësaj strukture të re.
“BN” raportoi pak ditë më parë se anëtarët prokurorë të Këshillit të Lartë të Prokurorisë kishin marrë sinjale nga maxhoranca që të votonin emrin e Gent Ibrahimit si kryetar të tyre. Këto sinjale, diku “miqësore” e diku me “presion” e arritën qëllimin.
Tre nga 6 prokurorët e përzgjedhur si anëtar të Këshillit të Lartë të Prokurorisë ende nuk i kanë mbyllur llogaritë me procesin e Vetingut. Anëtarët Gent Osmani, Antoneta Sevdari dhe Arben Dollapaj u konfirmuar në detyrë nga Komisioni i Pavarur i Kualifikimit. Por, Komisioneri Publik nuk është dakord me këtë rezultat dhe ka kërkuar zyrtarisht nga Kolegji i Posaçëm i Apelimit shkarkimin e tyre nga detyra.
Një anëtar i katërt, Besnik Cani, e kaloi fazën e parë të Vetingut, por me pikëpyetje shumë të mëdha nga vëzhguesi ndërkombëtar i ONM-së. Vendimi për të nuk është zbardhur ende dhe, pasi të bëhet publik, me shumë mundësi Komisioneri Publik do të kërkojë gjithashtu shkarkimin e tij.
Të gjendur në këtë situatë ligjore, pjesa më e madhe e anëtarëve prokurorë të Këshillit të Lartë të Prokurorisë janë lehtësisht të shantazhueshëm nga qeveria, e cila kontrollon institucionet e Vetingut.
Ky presion qeveritar, me shumë mundësi do të vijojë edhe në vendimmarrjet e tjera të Këshillit të Lartë të Prokurorisë. Kjo strukturë ka për detyrë të listojë kandidatët për Prokuror të Përgjithshëm, si edhe të përzgjedhë prokurorët që do të jenë pjesë e strukturës së posaçme hetimore, SPAK.
Duke kontrolluar vendimmarrjen e Këshillit të Lartë të Prokurorisë, maxhoranca e Edi Ramës e ka më të lehtë që të përcaktojë tek SPAK-u prokurorë, të cilët nuk do i krijojnë kokëçarje njerëzve të saj, të përfshirë në raste galopante korrupsioni, si edhe në bashkëpunim me njerëz dhe organizata të krimit të organizuar.
“BN” e paralajmëroi zgjedhjen e Gent Ibrahimit në krye të Këshillit të Lartë të Prokurorisë, ashtu siç paralajmëroi dhe rezultoi saktësisht ashtu, përzgjedhjen e 3 anëtarëve nga prokuroritë e shkallës së parë.
“BN” paralajmëroi saktë zhvillimet e para të Këshillit të Lartë të Prokurorisë, jo për shkak të ndonjë dhuntie të veçantë në parashikimin e gjërave. Por, parashikimet rezultuan të sakta, për faktin segment çdo lloj gare është e paracaktuar nga maxhoranca, e cila tashmë, edhe formalisht, ka nën kontrollin e saj çdo hallkë të institucionit hetimor në Shqipëri.
