Vijon lufta Rama-Meta. Përplasja e fundit është për propozimin e Vitore Tushës në postin e kryetares së KLSH-së.
Pak ditë pasi Presidenti Ilir Meta ktheu në Kuvend buxhetin e vitit 2019-të, Komisioni i Ekonomisë i ktheu sot atij dekretin për Vitore Tushën. Meta e propozoi anëtaren e Gjykatës Kushtetuese për kreun e Kontrollit të Lartë të Shtetit, por sipas kryetarit të komisionit të Ekonomisë, Erjon Braçe, Vitore Tusha nuk ka përvojë financiare, një element thelbësor sipas tij për këtë post.
“Zonja Tusha nuk ka eksperiencë në fushën e kontrollit financiar dhe ekonomik, e cila është një specifikë shumë e domosdoshme për kryetarin e KLSH-së. Plus, Tusha është zv/ kryetare e KED (Këshilli i Emërimeve në Drejtësi) dhe nuk mund të zëvendësohet, pasi shorti hidhet njëherë në vit dhe për shkak të detyrës rrezikon vijimin normal të organit të ri, proces më i rëndësishëm se KLSH,” – tha Braçe.
