Nga Boldnews.al
Kryeministri Edi Rama i mbyllur në zyrën e tij me pikturara të zhgarravitura e një minikoshi basketbolli, po jeton momentet e ankthit në pesë vite qeverisje. Protestat masive të studentëve po ia numërojnë ditët së prapthi, ndërsa bën betejë me rrjetet sociale, me shpresën se të rinjtë do të parçahen dhe një përfaqësi e tyre do e takojë. Nëse kjo ndodh, ky “usta i manipulimit” do shënojë një fitore të rëndësishme, por këtë radhë studentët kanë paraqitur tetë kërkesa me shënimin e prerë: “Plotëso kushtet, nuk ka negociata, nuk dilogojmë”.
Pikërisht kjo është ajo që e tmerron këtë kryeministër. Ai nuk di të qeverisë me akte dhe nisma të një shtetari për të marrë vendime ligjore për zgjidhjen e problemeve. Mjeshtria e tij e dalë tërsisht nga moda dhe e përbuzuar nga studentët, është që ai kërkon vetëm të flasë. Të marrë në duar kauzën e studentëve dhe ashtu si në kinën komuniste, ky “Mao Ce Dun” i ri të vërsulet kundër profesorëve.
Sot në mesazhin e fundit drejtuar studentëve ngre “shqetësimin” se qytetarët nuk ua kanë kusur studentëve që bllokojnë rrugët. “A mund t’ju pyes juve që ju mësojnë Doktorresha dhe Artisti të bllokoni rrugët e qytetit e dyert e fakulteteve, ndërkohë që mbani bllokuar rrugën e Dialogut, duke iu hedhur në fyt me sharje e akuza atyre që duan Dialog: Po çfarë borxhi ju kanë juve qytetarët e studentët e tjerë?”. Ky ishte mesazhi i plotë i një kryeministri, që më së paku kërkon të rrisë zemërimin qytetar për bllokimin e rrugëve nga ana e protestusve studentë.
E parë si reagim mund të duket një monolog rutinë e kryeministrit, por është deklaratë tepër e djallëzuar. Tashmë ai kërkon që qytetarët të armiqësohen me studentët. Që ata mundësisht të dalin nga makinat e pse jo kacafyten me të rinjtë që po ngrenë jo vetëm kauzat e tyre, por gjithë shqipërisë.
Po a e di ky kryeministër që ata qytetarë që lëvizin me automjete paguajnë 200 lekë litrin e naftës, ku 90 lekë janë taksë që shkon në arkën e qeverisë? A e di kryeministri virtual që edhe nëse qytetarët mund të stresohen për qëndrimin në trafik nuk mund të nxiten kundër studentëve? Sigurisht që ai edhe nëse nuk i di vetë, pasi nuk del nga (kulla e fildishtë), dikush nga “këshilltarët” mund tia thotë të vërtetën që qytetarët mbështesin kauzat e studentëve pasi kanë shpresë se revolta e tyre do i nxisë nesër për të kërkuar edhe ata çdo të drejtë të mohuara.
Megjithatë rreziku qëndron. Mes qytetarëve ka edhe partiakë të thekur Rilindas që nuk mund të durojnë tu mërzitet “shefi i madh”. Ka FRESH-istë që ëndërrojnë të jenë në poste politike me në krye kryeqeveritarin virtual Edi Rama. Ndaj më shumë se të nxisë qytetarët kundër studentëve ai duket se po i bën thirrje taborrit të tij politik të Rilindjes që të dalë nga rrjetet sociale dhe reagojnë ndaj studentëve, për të nxitur klimën e konfliktit, përçarjes e dhunës.
