Nga Boldnews.al
Prokurorët e Strukturës së Posaçme Antikorrupsion, SPAK, do të përzgjidhen nga të paktën 3 prokurorë, anëtarë të Këshillit të Lartë të Prokurorisë, të cilët ende nuk kanë mbyllur llogaritë e tyre me Vetingun.
Prokurorët Gentian Osmani, Arben Dollapaj e Antoneta Sevdari, të zgjedhur më herët gjatë javës si anëtarë të Këshillit të Lartë të Prokurorisë, rrezikojnë të largohen nga sistemi, pasi Komisioneri Publik dhe Operacioni Ndërkombëtar i Monitorimit kërkojnë shkarkimin e tyre nga Kolegji i Posaçëm i Apelimit.
Kësaj treshe prokurorësh, me shumë mundësi pritet t’i bashkohet edhe një anëtar i katërt, Besnik Cani, për të cilin ONM shprehu rezerva të shumta gjatë seancës dëgjimore, në vijim të së cilës u konfirmua në detyra nga shkalla e parë e Vetingut, Komisioni i Pavarur i Kualifikimit.
Këshilli i Lartë i Prokurorisë ka për detyrë, ndër të tjera, të përzgjedhë prokurorët e Njësisë së Posaçme Antikorrupsion, struktura më e rëndësishme e Reformës në Drejtësi, e cila do të hetojë zyrtarët më të lartë të shtetit shqiptar.
KLP përbëhet nga 11 anëtarë, 5 juristë jo-prokurorë, të përzgjedhur vetëm me votat e maxhorancës socialiste dhe 6 prokurorë. Nga anëtarët prokurorë, 3 prej tyre janë në varësi të vullnetit qeveritar, i cili kontrollon plotësisht organet e Vetingut, përfshirë edhe Kolegjin e Posaçëm të Apelimit që pritet të thotë fjalën e fundit për karrierën e tyre.
Nëpërmjet kësaj skeme, qeveria dhe maxhoranca, kanë tashmë nën kontroll edhe vendimmarrjen e KLP-së për përzgjedhjen e prokurorëve, të cilët do të jenë pjesë e Strukturës së Posaçme Antikorrupsion.
Me marrjen nën kontroll të SPAK, maxhoranca aktuale siguron “paprekshmërinë” e saj për një kohë të gjatë, pavarësisht pozitës politike që mund t’i rezervojë e ardhmja.
Gjatë kësaj jave u përzgjodhën anëtarët e Këshillit të Lartë Gjyqësor dhe Këshillit të Lartë të Prokurorisë, struktura të rëndësishme që do të trajtojnë karrierën e gjyqtarëve dhe prokurorëve.
Ndërmjet anëtarëve të KLGJ dhe KLP, që janë nga sistemi i drejtësisë, ka një diferencë shumë të madhe. Anëtarët e Këshillit të Lartë Gjyqësor janë të gjithë gjyqtarë që e kanë kaluar me sukses të gjithë fazat e Vetingut. Ndërsa, në radhët e Këshillit të Lartë të Prokurorisë, gjysma e prokurorëve janë në pritje të fjalës së fundit nga Kolegji i Posaçëm i Apelimit
